14 no ME

MATATIA PEATA
e apotoro

Oro'a

TAIORAA MATAMUA
                                                               « Riro atura te kelero ia Matatia. Amuihia atura oia i na apotoro tino ahuru ma hoe ra »
A taio tatou i te Ohipa a te mau Apotoro             1, 15-17.20-26
I taua mau mahana ra, ua ti’a a’era Petero i nia i ropu i te mau taeae (e riro e, hoe hanere ’e e piti ahuru te taata i putuputu mai i reira), ’e ua na ö atura : « E te mau taeae e, ia tupu te parau i papaihia ra e ti’a ai, ta te Varua-Maitai hoi i parau mai, na roto i te vaha o Davida, no Iuda, o tei riro ei aratai no te feia i tapea ia Iesu. Ua amuihia hoi oia ia matou, ’e ua noaa täna tuhaa i roto i ta matou taviniraa. Ua papaihia hoi i roto i te puta Salamo : Ia ano töna puhapa, ’e ia ore ia parahi-faahou-hia e te taata, ’e ia riro töna toroa ia vetahi ’ë. No reira, i roto i te mau taata i amui mai ia matou i te anotau i parahi mai ai te Fatu ra o Iesu i rotopu ia tatou nei, mai te papetitoraa mai ä a Ioane e tae noa mai nei i te mahana i rave-’ë-hia ai oia no roto atu ia tatou, ia faataahia te hoe e ti’a ai, ia riro oia, ’e o matou atoanei hoi, ei ite no töna tiafaahouraa. » Ua faataa maira ratou i na taata toopiti : o Iosepha, o tei mairihia ia Barasaba, ’e o tei parau-atoa-hia ra e, o Parautia, ’e o Matatia. Ua pure ihora ratou, na ö atura : « E te Fatu, ua ite oe i te mafatu o te mau taata atoa, a faaite mai oe i te taata ta oe i maiti i roto ia raua toopiti nei ei mono no Iuda i te ti’araa täna i faarue i roto i te taviniraa apotoro, a haere atu au i te vahi e au nona. » Ua tuu ihora ratou i te kelero, riro atura te kelero ia Matatia. Amuihia atura oia i na apotoro tino ahuru ma hoe ra.

    - O te Parau ïa a te Atua.

SALAMO                                            112, 1-2, 3-4, 5-6, 7-8
R/ Ua tuu te Fatu iana i rotopu i te huiarii o tona nunaa.

E aore râ :    Alleluia !

E te mau tavini o te Fatu, a arue atu,
a arue atu i te i’oa o te Fatu !
Ia haamaitai te i’oa o te Fatu
mai teie atu nei e a muri noa atu !

Mai te hiti’a mai o te râ e tae noa atu i te tô’o’a,
ia aruehia to i’oa o te Fatu
E teitei te Fatu i te mau nunaa atoa,
tei nia tôna hanahana i te mau ra’i.

O vai tei au i te Fatu i to tatou Atua,
o tei parahi i te vahi teitei,
o te hio i raro, ia mataitai oia
i te ra’i e te fenua nei.

E faateitei oia i tei haehaa, mai raro mai i te repo ;
e faatia a’e i tei veve ra, mai raro mai i te tïria pera,
a faanoho roa ai iana i rotopu i te hui arii ;
i rotopu i te hui mana o tona iho ra nunaa.

ALLELUIA
Alleluia. Alleluia.
O vau rä tei maiti ia outou ’e tei faataa ia outou,       cf. Ioa 15, 16
ia haere outou, ’e ia hotu mai te i te mäa,
’e ia vai maite to outou hotu, te na ô maira te Fatu.
Alleluia.

EVANELIA
                                              « E ere o outou tei maiti mai ia’u, o vau rä tei maiti ia outou »
Evanelia o Iesu-Kirito a Ioane peata           15, 9-17
I teie tau ra, ua parau atura oia Iesu i taua mau pipi : « Mai te Metua i here mai ia’u nei, ua here atoa vau ia outou na. A parahi i roto i te here no’u nei. Ia tapea outou i tä’u mau faaueraa, e parahi ïa outou i roto i tö’u here, mai ia’u, i tapea i te mau faaueraa a ta’u Metua, ’e mai ia’u hoi e parahi nei i roto i töna here. I parau atu vau i taua mau parau ra ia outou, ia tupu tö’u oaoa i roto ia outou, ’e ia hope roa i te rahi. Teie tä’u faaueraa : ia here outou ia outou iho, mai ia’u i here atu ia outou na. Aita o te taata e here rahi a’e i teie : ia horoa oia i töna ora no töna mau hoa. O outou tö’u mau hoa, ia rave outou i te mau mea atoa tä’u e faaue atu ia outou. E ore au e parau faahou atu ia outou e, e tavini ; no te mea aita te tavini i ite i tei ravehia e töna fatu. Ua parau atu rä vau ia outou e, e hoa, no te mea ua faaite au ia outou i te mau parau atoa tä’u i faaroo i ta’u Metua. E ere o outou tei maiti mai ia’u, o vau rä tei maiti ia outou ’e tei faataa ia outou, ia haere outou, ’e ia hotu mai i te mäa, ’e ia vai maite to outou hotu, ia horoa te Metua ia outou i te mau mea atoa ta outou e ani iana ma tö’u nei i’oa. Teie tä’u e faaue atu nei ia outou : ia here outou ia outou iho. »

    - Haapopou tatou i te Parau a te Atua.