MAHANA MAHA MO’A

MAHANA MAHA MO’A

I te pô :

OROA NO TE FAATIARAAHIA TE EUHARI

TAIORAA MATAMUA
Te mau faanahonahoraa no te amuraa maa Pasa
A taio tatou i te puta Exodo 12, 1-8.11-14
Ua parau atoa maira te Fatu ia Mose raua o Aarona i te fenua ra i Aiphiti : « Teienei marama ei marama matamua ïa no outou ; ei marama matamua teie i te mau marama’toa o te matahiti. E parau atu orua i te amuiraa o te mau tamarii a Iseraela, e naô atu orua ia ratou : Ia tae i te rui ahuru aore o teie marama, e rave te taata’toa i te hoe fanaua mamoe, hoe utuafare hoe fanaua mamoe, hoe fare, hoe fanaua mamoe. E ia iti râ to te hoe utuafare taata ia pau ia ratou te hoe fanaua mamoe, e tii atu i te taata tupu o te utuafare i tapiri mai i tana, ia navai te taata e pau ai taua fanaua ra ia amu. Ei fanaua mamoe viivii ore, ei oni, ei fanaua matahiti hoe ; e aore ra ei fanaua puaaniho te rave mai te au i tei faaite hia mai ra. E tapea maite i te reira e ia tae noa’tura i te ahuru ma maha o te mahana no teienei marama, e na te amuiraa taatoa o te mau tamarii a Iseraela e tupai i te ahiahi ra. E rave hoi ratou i te toto, a parai ai i nia pou uputa e te tea i nia’e, i te mau fare e amu ai ratou i te reira. E amu ratou i taua rui ra, i te maâ tunu paa hia i te auahi, e ma te pane faahopue ore hia e ma te pota maramara ra. Mai teie hoi ta outou amuraa’tu i te reira : ia tatua hia to outou tauupu, ia tamâ hia to outou na avae, ma te raau turutootoo i to outou rima, e faaoioi i te amu, no te mea o te Pasa a te Fatu. E i taua rui ra, na rotopu i te fenua Aiphiti au i te haere, e na’u ïa e tairi i te mau matahiapo atoa te fenua Aiphiti, a te taata e ta te puaâ, e e faautua’tu au i te mau atua a to Aiphiti ra ; o vau, o te Fatu. Ei tapao taua toto ra e ite ai au ia outou i te mau fare i faaea hia’i e outou ; e hio vau i taua toto ra, e haere au na roto ia outou ; e ore roa te ati pohe e mairi mai i nia ia outou na, a tairi ai au i te fenua o Aiphiti. Ei haamanaoraa no outou teienei mahana, e e haapao outou i te reira ei mahana oroa rahi i te Fatu e hope roa to outou mau ui atoa ra; ei haapaoraa tamau ïa te reira.

- O te Parau ïa a te Atua.

SALAMO 115 , 3-4, 6-7ac, 8.10
R/ Te au’a haamaitairaa, e apitiraa ïa i te toto o te Kirito.

Nahea ra vau e faahoona’i i te Fatu
i te maitai atoa tana i tuu mai ia’u nei ?
E faateitai au i te aua o te ora
ma te tiaoro i te ioa o te Fatu.

E mea taoa i te aro o te Fatu,
te poheraa o tona ra feia moâ.
Aue ! E te Fatu e, o vau nei hoi to tavini,
te tatara nei oe i ta’u mau taai.

E pupu atu vau i te tutia haamaitai ia oe
ma te tiaoro i te ioa o te Fatu ;
e faatupu vau i ta’u mau euhe i te Fatu,
e ia tia mai tona nunaa.

TAIORAA PITI
« I te mau taime atoa hoi e amu ai outou i teie pâne ’e e inu ai i teie nei au’a, e faaite ïa outou i te poheraa o te Fatu »
A taio tatou i te epitore matamua a Paulo peata i to Korinetia 11, 23-26
E au mau taeae, ua tuuhia mai hoi ia’u, no ô mai i te Fatu ra, te parau tâ’u i tuu atu ia outou : i te ru’i i haavarehia ai oia, ua rave ihora te Fatu ra o Iesu i te pâne, ua haamaitai atura oia i te Atua, ’e ua vavahi ihora i taua pâne ra, na ô atura : « O ta’u tino teie, o te horohia nei no outou. E na reira outou ei haamanaoraa ia’u. » Ua na reira atoa oia i te au’a, i muri a’e i te amuraa mâa, na ô atura : « Teie nei au’a, o te Faufaa api ïa i tô’u nei toto. E na reira outou i te mau taime atoa e inu ai outou i te reira ei haamanaoraa ia’u. » I te mau taime atoa hoi e amu ai outou i teie pane ’e e inu ai i teie nei au’a, e faaite ïa outou i te poheraa o te Fatu e tae noa mai ai oia ra.

- O te Parau ïa a te Atua.

IRAVA I MUA I TE EVANELIA
Ei hanahana e ia aruehia oe, e te Fatu e Iesu e !
« E faaueraa api ta oe e hô mai nei ia matou : cf. Ioa 13, 34
A here outou ia outou
iho mai ia’u i here ia outou na. »
Ei hanahana e ia aruehia oe, e te Fatu e Iesu e !

EVANELIA
« Here atura oia ia ratou e tae roa atura i te hopea »
† Evanelia o Iesu-Kirito a Ioane peata 13, 1-15
Hou te hora i te Pâsa ra, ite a’era Iesu e, ua tae i tôna hora e haere ai oia mai teie atu nei ao i te Metua ra, oia i here i tôna mau taata i te ao nei, here atura oia ia ratou e tae roa atura i te hopea.
’E, i roto i te hoe amuraa mâa, (ua faatupu ’ê na ïa te diabolo i te opuaraa e haavare iana i roto i te mafatu o Iuda a Simona Isakariota), ’e no te mea ua ite oia e, ua hope te mau mea atoa i te tuuhia mai i roto i tana rima e te Metua ra, i te mea atoa hoi no ô mai oia i te Metua ’e te hoi atu ra oia i te Atua ra, ti’a a’era oia i nia, iriti a’era i tôna iho mau ahu ’ê, ’e ua pareu maira iana i taua ahu ra. Ninii ihora oia i te pape i roto i te hoe farii, ’e ua haamata atura i te horoi i te avae o tana mau pipi ’e i te tamarô i te aho tâna i pareu mai. ’E, tae atura ia Simona Petero, ua parau maira oia iana : « E te Fatu, na oe e horoi mai i ta’u avae ? » Ua pahono atura Iesu iana : « Aita i taa ia oe te ohipa tâ’u e rave nei i tenâna, a muri a’e e taa ai ia oe. » Ua parau mai Petero iana : « E ore oe e horoi mai i ta’u avae e a muri noa atu ! » Ua pahono atura Iesu iana : « Ia ore au e horoi i tô avae, eita oe e taoahia ’e o vau atoa ra. » Ua pahono maira Simono Petero iana : « E te Fatu, eiaha ta’u avae anae, o ta’u rima atoa râ ’e ta’u upoo ! » Ua parau atura Iesu iana : « O tei hopu i te pape ra, eiaha oia ia horoi faahou iana iho, ua mâ roa hoi oia. ’E ua mâ outou, eiaha râ outou atoa. » Ua ite hoi oia na vai oia e haavare, i parau ai oia e : « aita outou atoa i mâ. »
’E, oti a’era to ratou avae i te horoihia e ana, ua ahu faahou ihora oia i tôna ahu, ’e ua parahi ihora i nia i te amuraa mâa, ’e ua parau atura oia ia ratou : « Ua taa anei ia outou te auraa o te ohipa tâ’u i rave iho nei ia outou ? Te parau mai nei hoi outou ia’u : E te Orometua, e te Fatu, ’e ua tano ta outou parau, oia mau â hoi au nei. Ua horoi ’unâ hoi au, o vau te Orometua ’e te Fatu, i to outou avae, ia horoi atoa outou i to outou avae te tahi i te tahi e ti’a ai. Ua faaite au ia outou i te hioraa, ’e o tâ’u i rave iho nei ia outou, na reira atoa outou. »

- Haapopou tatou i te Parau a te Atua.