Dominika 1 - 40raa B

DOMINIKA 1 - 40RAA - B

TAIORAA MATAMUA
Ua fafau te Atua i tana faufaa ia Noa o tei ora i te diluvi
A taio tatou i te puta Genese 9, 8-15
Teie hoi te parau a te Atua ia Noa e i tana ra mau tamarii atoa. « Inaha ! E fafau atu au i ta’u nei faufaa ia outou e i ta outou huaai amuri atu. E i te mau mea ora’toa io outou na, i te mau manu pererau, e te mau puaa rarahi, e te mau huru puaa’toa tei haere mai no roto mai i te araka ra, e i te mau puaa taetaevao atoa hoi no te fenua nei. E fafau atu au i ta’u nei faufaa ia outou, e e ore e pohe faahou te mau mea ora i te mau pape diluvi ; e ore e diluvi faahou ei haamou i te fenua. » Ua parau mai hoi te Atua : « Teie te tapao o ta’u nei faufaa, ta’u nei faufaa, ta’u e tuu atu i rotopu ia’u nei e ia outou na, e te mau mea ora’toa io outou na, no te mau ui atoa e amuri noa’tu. O ta’u anuanua i te ata ra ta’u ïa e tuu nei, e ei tapao ïa no te faufaa i rotopu ia’u nei e i to te ao atoa ra. E ia tapoi au i te rai i te mau ata, e itea hia ta’u anuanua i roto i taua mau ata ra. Ei reira vau e haamanao ai i ta’u nei faufaa ia outou na, e i te mea’toa e tino ora to ratou ; e ore hoi e tupu faahou mai te mau pape diluvi ei haamou roa i te mau mea’toa e ora nei. »

- O te Parau ïa a te Atua.

SALAMO 24, 4-5ab, 6-7, 8-9
R/ Te mau haerea’toa o te Fatu ra, e here anae ïa e e parau-mau,
no te feia i haapao i tana parau-faaau.

A faaite mai oe ia’u i to oe mau éâ, e te Fatu e,
e a haapii mai ia’u i to oe na mau haerea.
A aratai oe ia’u i roto i te parau mau a oe ra, e a haapii mai ia’u ;
o oe hoi te Atua no to’u ora.

A haamanao i to oe na aroha faaherehere, e te Fatu e,
e to oe na here, o tei vai noa hoi, mai te matamua mai â.
Eiaha oe e manaonao i te mau hapehape o to’u ra apiraa.
E haamana’o mai râ oe ia’u mai te au i to aroha ra.

E parautia te Fatu e e maru hoi,
e faatitiaifaro i te haerea a te feia hara ;
e aratai oia i te feia rii haehaa na te êâ o te parautia,
e e haapii oia i tona êâ i te feia ati ra.

TAIORAA PITI
Te papetitoraa o te faaora ia outou i teienei
A taio tatou i te epitore matamua a Petero peata 3, 18-22
E au mau here e, ua pohe hoi te Kirito i te poheraa hoe roa no te mau hara ; oia te taata parautia ra, ua pohe ïa no te feia parautia ore, ia aratai oia ia outou i te Atua ra ; oia i haapohehia t?na tino, ua faaorahia e te Varua. I reira ïa t?na haereraa e a’o i te mau varua i roto i te tapearaa, i te feia aore i faaroo i mutaa iho ra, i te tau o te faaoroma’iraa roa o te Atua, i te mau mahana i hamani ai Noa i te araka. Aore re’a e taata i ora i taua araka ra na roto i te pape, e toova’u anae. E taipe ïa no te papetitoraa, o te faaora ia outou i teienei. E ere te papetitoraa i te horoiraa i te mau viivii o te tino nei, o te hoe r? parau fafau i te Atua ma te manava maitai. E faaora te papetitoraa ia outou, na roto i te tiafaahouraa o Iesu-Kirito. O tei reva i te ra’i ra, ’e ia oti te mau melahi, te feia hau ’e te hui mana i te tuuhia i raro a’e iana ra, ua parahi ihora oia i te rima atau o te Atua.

- O te Parau ïa a te Atua.

IRAVA I MUA I TE EVANELIA
Ta oe Parau, e te Fatu e, e Parau mau ia,
e ta oe na ture e faaoraraa ia.
E ore te taata e ora i te faraoa anae ra,
te mau parau atoa râ no ò mai i te vaha o te Atua.
Ta oe Parau, e te Fatu e, e Parau mau ia,
e ta oe na ture e faaoraraa ia.

EVANELIA
« Ua faahemahia Iesu e Satane e te tavini ra te mau melahi iana ra »
† A taio tatou i te Evanelia a Mareko peata 1, 12-15
I taua anotau ra, no papetito-noa-hia’tura Iesu. ’E, i reira ra, tono atura te Varua-Maitai iana i te medebara. E maha ahuru mahana oia i te medebara i te tamataraahia e Satane. Tei rotopu oia i te mau puaa taetaevao, ’e te tavini mai ra te mau melahi iana ra. I muri a’e i to Ioane tapearaahia, haere atura Iesu i Galilea, ’e ua poro haere atura i te Evanelia o te Atua i te na ?raa e : « Ua hope te tau, ua fatata mai nei te Basileia o te Atua : a tatarahapa ’e a faaroo i te Evanelia. »

- Haapopou tatou i te Parau a te Atua.