Te Tino Mo'a e te Toto o te Kirito

I te dominika i muri mai i te Toru-Tahi Mo’a.

TE TINO MO’A E TE TOTO O TE KIRITO

Oro’a hanahana

TAIORAA MATAMUA

« Horoa ihora te Fatu no oe i te mana ei maâ tei ore i itea ia oe ra e i to mau metua »

A taio tatou i te puta Deuteronomi 8, 2-3.14b-16a

Ua parau atura Mose i te nunaa Iseraela : e haamanao hoi oe i taua eâ’toa ra ta te Fatu ra to Atua i aratai mai ia oe na roto i te medebara, e a maha aenei ahururaa i te matahiti, ei faautua iaoe, e ei tamata e ia itea i roto i to oe na aau, te haapao anei oe i tana ra mau faaueraa, e aita anei. Ua faautua oia ia oe i te poia, horoa ihora no oe i te mana ei maâ, tei ore i itea ia oe ra e i to mau metua ei faaite ia oe e, e ore te taata e ora i te pane anae ra, i te parau atoa râ tei pihaa mai no roto mai i te vaha o te Atua ra. E aramoina ihora ia oe te Fatu ra toAtua tei aratai mai ia oe mai te fenua Aiphiti maira, mai te utuafare o te tîtîraa ra ; o tei roro ei aratai no oe na roto i te medebara rahi e te riaria, te i reira te ophi aho veavea ra, e te manu patia e te ophi ; aore roa’tu hoi e pape : o tei faatahe mai i te pape no roto i te mato paari rahi. O tei faaamu ia oe i roto i te medebara i te mana, tei ore i itea i to oe mau metua.

- O te Parau ïa a te Atua.

SALAMO 146-147, 12-13, 14-15, 19-20

R/ A faatupu oroa i te Fatu, o Ierusalema e !

A faatupu oroa i te Fatu, o Ierusalema e !
A arue i te Atua, o Siona e !
I faaetaeta na oia i te mau tea o to oe mau uputa
i haamaitai na i to mau tamarii iô oe na.

Na’na te faatupu nei i te hau i to oe na fenua,
te paia nei oe ia’na i te hinuhinu o te titona.
E faatae oia i tona tuuraa reo i nia i te fenua
e mea oioi te here o tona ra reo.

Ua heheu i tana parau ia Iakoba,
i tana mau ture e tana mau faaotiraa ia Iseraela :
aore e nunaa i na reira hia e ana i te rave
aore hoe noa i ite i tana mau faaotiraa.

TAIORAA PITI

« No te mea hoe ä päne, tatou atoa e rave rahi nei, hoe ä ïa tino »

A taio tatou i te epitore matamua i to Korinetia 10, 16-17

E au mau taeae e, ia inu tatou i te au’a haamaitairaa ta tatou e haamaitai nei, e ere anei te reirai te apitiraa i te toto o te Kirito ? ’E ia amu tatou i te päne ta tatou e ofati nei, e ere anei te reira i te apitiraa i te tino o te Kirito ? No te mea hoe ä päne, tatou atoa e rave rahi nei, hoe ä ïa tino, te apiti nei hoi tatou i taua päne hoe ra.

- O te Parau ïa a te Atua.

HIMENE : "Panis angelicus" (Raanuu api 290) (ad libitum)

ALLELUIA

Alleluia. Alleluia.
O vau te päne ora e pou mai mai te ra’i mai, Ioa 6, 51
te na ô maira te Fatu,
o te amu i taua päne ra, e ora ïa e a muri noa atu.
Alleluia.

EVANELIA

« E mäa mau hoi tö’u tino, ’e e inu mau tö’u toto »

Evanelia o Iesu-Kirito a Ioane peata 6, 51-58

I taua anotau ra, ua parau atura Iesu i te mau tiaa rahi taata Ati-Iuda : « O vau te päne ora, e pou mai mai te ra’i mai. O te amu i taua päne ra, e ora ïa e a muri noa atu. E te päne tä’u e horoa, o tö’u ïa tino, o te horoahia ia noaa te ora i to te ao nei. » Ua märö hua ihora te Ati-Iuda ratou ratou iho : « E aha e ti’a ai i teie nei taata ia horoa mai i töna tino ei mäa na tatou ? » Ua parau atura Iesu ia ratou : « Amene, amene, te parau atu nei au ia outou : ia ore outou ia amu i te tino o te Tamaiti a te taata, ’e ia ore outou ia inu i töna toto, e ore ïa te ora e vai mai i roto ia outou ; o te amu i tö’u tino ’e e inu i tö’u toto, ua noaa ïa iana te ora mure ore, ’e e faatia faahou vau iana, ia tae i te mahana hopea ra. E mäa mau hoi tö’u tino ’e e inu mau tö’u toto. O te amu i tö’u tino ’e e inu i tö’u toto, e parahi oia i roto ia’u ’e o vau hoi i roto iana. ’E mai te Metua e ora ra, ’e mai ia’u e ora nei i te Metua, oia atoa te taata e amu ia’u nei : e ora oia ia’u. O te päne ïa i pou mai mai te ra’i mai, e ere taua päne nei mai te päne i amuhia e to outou hui metua ; ua pohe hoi ratou, area te amu i teie nei päne, e ore oia e pohe e amuri noa atu. »

- Haapopou tatou i te Parau a te Atua.