DOMINIKA 6 i te tau PAKATE

TAIORAA MATAMUA

« Tutuu ihora raua i to raua rima i nia iho ia ratou, ’e ua horohia maira te Varua-Maitai ia ratou »

A taio tatou i te Ohipa a te mau Apotoro 8, 5-8.14-17

I taua mau mahana ra, ua tae atura Philipa i roto i te hoe oire i Samaria, ’e ua a’o atura i te parau o te Kirito. ’E ia faaroo maira to Samaria i täna parau, ’e ia ite maira i te mau tapao täna e rave ra, e tiaa rahi taata tei tamau i te faaroo iana ma te anaanatae ’e te rötahi o te aau. E rave rahi hoi te varua viivii e haere i rapae i te feia i uruhia ra, ma te pii hua te reo. E rave rahi atoa te hapepa ’e te pirioi i faaorahia. Rahi roa a’era te oaoa o to taua oire ra. ’E faaroo a’era te mau apotoro i Ierusalema e, ua faarii to Samaria i te parau a te Atua, ua tono atura ratou ia Petero raua o Ioane. ’E, tatae atura raua, ua pure ihora no to Samaria, ia horoahia mai te Varua-Maitai ia ratou. Aita ä hoi te Varua-Maitai i pou mai i nia ia ratou, ua papetito-noa-hia ratou i te i’oa o Iesu. Tutuu ihora raua i to raua rima i nia iho ia ratou, ’e ua horoahia maira te Varua-Maitai ia ratou.

- O te Parau ïa a te Atua.

SALAMO 65, 1-3a, 4-5, 6-7a, 16.20

R/ A popo na i te Atua, e te ao taatoa e !
e aore râ : Alleluia !

A popo na i te Atua, e te ao taatoa e !
A himene i te hanahana no tona i’oa,
a arue atu i tona hinuhinu.
A nao atu i te Atua e : « Aue oe e te au ïa matau hia e !

I mua i to aro e tipapa te ao taatoa ;
e himene oia ia oe, e himene oia no to oe na io’a. »
A haere mai na e hio i te mau ohipa taa é a te Atua,
e mau ohipa matautau no te tamarii a te taata nei !

Ua riro ia’na te miti ei fenua mar?.
Ua na raro noa te taata i te haere na roto i te anavai aano.
Ei iana to tatou o?o?.
Oia te Arii i etereno tona mana.

Haere mai na, e te feia mataû i te Atua e !
E tuatapapa vau i tana i rave no tau nei varua.
Ia haamaitai hia te Atua, oia tei ore i haapae i to’u pure
e tei ore i faaatea i tona aroha ia’u.

TAIORAA PITI

« Oia i haapohehia töna tino, ua faaorahia e te Varua »

A taio tatou i te epitore matamua a Petero peata 3, 15-18

E au mau here e, e faaraa rä outou i te Fatu i te Kirito ra i roto i to outou mafatu. Ia vai ineine ä outou i te faatia i to outou tiaturiraa i mua i te feia atoa e uiui mai ia outou no nia i taua tiaturiraa ra. Teie rä, ia na reira outou ma te marü ’e te faatura i te taata ’e ma te manava hapa ore, ia haama te feia e faaino mai i ta outou haapao-maitai-raa i te parau a te Kirito, ia haama i ta ratou faainoraa. ’E, ia ti’a i te Atua ia riro ta outou raveraa i te maitai ei tumu no to outou mau pohe, e mea au a’e ïa te reira i te pohe no ta outou raveraa i te ino. Ua pohe hoi te Kirito i te poheraa hoe roa no te mau hara ; oia te taata parautia ra, ua pohe ïa no te feia parautia ore, ia aratai oia ia outou i te Atua ra ; oia i haapohehia töna tino, ua faaorahia e te Varua.

- O te Parau ïa a te Atua.

ALLELUIA

Alleluia. Alleluia.
Ia here mai te hoe taata ia’u, e haapao oia i tä’u parau,
te na ô maira te Fatu ;
e herehia oia e ta’u Metua, ’e e haere atu maua iana ra.
Alleluia.

EVANELIA

« ’E na’u e pure i te Metua l’e nana e horoa mai i te tahi atu Faaa’o ia outou »

Evanelia o Iesu-Kirito a Ioane peata 14, 15-21

I taua anotau ra, ua parau atura Iesu i t?na mau pipi « I here mai outou ia’u ra, e tapea ïa outou i tä’u mau faaueraa, ’e na’u e pure i te Metua, ’e nana e horoa mai i te tahi atu Faaa’o ia outou, ia parahi oia ’e outou atoa e a muri noa atu. O te Varua parau mau ïa. E ore e ti’a i to te ao nei te faarii iana, aita hoi to te ao nei i hio iana’e i ite iana. Area outou, ua ite outou iana, no te mea te parahi nei oia io outou na ’e e haere mai oia i roto ia outou. E ore au e vaiiho otare noa ia outou : e hoi mai ä vau ia outou nei. Ia roaroa iti a’e, eita to te ao nei e ite faahou mai ia’u ; area outou, e ite mai ïa ia’u, no te mea te ora nei au ’e e ora atoa outou. Ia tae i te reira mahana, e ite outou e, tei roto vau i ta’u Metua, ’e outou hoi i roto ia’u, ’e o vau i roto ia outou. O te faarii mai i tä’u mau faaueraa ’e e tapea,    o oia tei here mai ia’u. O te here mai ia’u ra, e herehia oia e ta’u Metua, ’e e here atoa vau iana, ’e e faaite au ia’u iho iana ra. »

- Haapopou tatou i te Parau a te Atua.