DOMINIKA 4 i te tau PAKATE

TAIORAA MATAMUA

« Ua faariro te Atua iana ei Fatu ’e ei Kirito »

A taio tatou i te Ohipa a te mau Apotoro 2, 14a.36-41

I te mahana Penetekote, ua ti’a a’era Petero i nia ’e te tino ahuru ma hoe atoa ra, ’e ua faateitei atura oia i tana reo, na ö atura : « Ia ite papu paoti te utuafare atoa o Iseraela e : taua Iesu nei ta outou i faatatauro ra, ua faariro te Atua iana ei Fatu ’e ei Kirito. » I to ratou faarooraa i taua mau parau ra, putapu atura to ratou mafatu, ’e ua parau maira ratou ia Petero ’e i te mau apotoro ra : «E te mau taeae e, e aha matou nei ? » Ua pahono atura Petero ia ratou : «A tatarahapa, ’e ia papetitohia outou atoa na i te i’oa o Iesu-Kirito, ia faaorehia ta outou hara, ’e e horohia mai ïa te Varia-Maitai ia outou. No outou hoi te parau i fafauhia mai ra, ’e no to outou mau tamarii, ’e no te feia atoa e ti’a i te atea ’ë ra, ta te Fatu ra to outou Atua e nomino atu. » ’E ua a’o atura Petero ia ratou, ’e ua faaitoito atura i te parau e rave rahi, na ö atura : «A faaora ia outou iho i teie nei u’i taiata. » Te feia atoa i faarii mai i täna parau, ua papetitohia ïa, ’e e mahere e toru tauatini taata i amui mai ia ratou i taua mahana ra.

- O te Parau ïa a te Atua.

SALAMO 22 (2), 1-2ab, 2c-3, 4, 5, 6

R/ O te Fatu tô’u tiai
e e ore roa vau e ere.
e aore râ : Alleluia !

O te Fatu tô’u tiai,
e e ore roa vau e ere.
I roto i te mau vahi matie api
i ’aua mai ai ia’u.

E aratai mai oia ia’u i te pape atatia.
Ua faaapi faahou mai oia i ta’u varua,
e aratai mai oia ia’u na te ea o te parautia,
no te tura o tona ra i’oa.

Ia haere noa atu vau na roto i te peho o te pohe ra,
e ore roa vau e mata’u a’e i te tino.
Tei pihai iho hoi ia’u to raau
e to turu to’oto’o ei haamahanahanaraa mai ia’u.

E faanahonaho mai oe i te amuraa maa na’u i mua
i te aro o to’u mau enemi,
e ninii mai oe i te noanoa i nia i ta’u upoo,
ua i ta’u au’a.

O te karatia e te oaoa te pee noa mai ia’u
i te mau mahana atoa o to’u nei oraraa.
To’u fare nohoraa, o te fare ïa o te Fatu e pau noa atu ai
te pu’e mahana o to’u nai oraraa.

TAIORAA PITI

« Ua hoi mai outou i te tiai ’e te paruru o to outou mau varua »

A taio tatou i te epitore matamua a Petero peata 2, 20b-25

E au mau here e, ia rave rä outou i te maitai ’e ia faaoroma’i i te papa’ira’a o te reira te mea au na te Atua. Ua nominohia hoi outou ia na reira outou, ua mauiui atoa hoi te Kirito no outou ’e ua vaiiho mai i tehioraa na outou, ia pee outou i töna mau taahiraa avae. Oia aore i rave i te hara, ’e aore hoi te haavare i itea i roto i töna vaha. Oia aore i faaino atu, ia faainohia mai oia ; i töna mauiuiraa, aore oia i parau tahoo atu ua püpü rä oia iana iho i roto i te rima o te haava parautia ra. Oia i amo i nia i töna iho ra tino i ta tatou mau hara, iana i patitihia i nia i te raau tatauro ra ; ia pohe tatou i te hara ’e ia ora tatou ma te parautia. Oia i faaora ia tatou i töna mau iravarava. I haere ’ë noa ana hoi outou mai te mamoe ra, i teienei rä, ua hoi mai outou i te tiai ’e te paruru o to outou mau varua.

- O te Parau ïa a te Atua.

ALLELUIA

Alleluia. Alleluia.
O vau te tiai mamoe maitai, te na ô maira te Fatu,       Ioa 10, 14
ua ite au i tä’u mau mamoe
’e ua ite hoi ratou ia’u.
Alleluia.

EVANELIA

« O vau te uputa o te mau mamoe »

Evanelia o Iesu-Kirito a Ioane peata 10, 1-10

I taua anotau ra, ua parau atura Iesu : «Amene, amene, te parau atu nei au ia outou : O te ore e tomo mai i roto i te aua mamoe na te uputa, o te pa’i’uma rä na te tahi atu vahi, e eia ïa ’e te haru. O te tomo mai rä na te uputa, o oia te tiai mamoe. E iriti te tiai-uputa i te opani, ia tomo mai oia, ’e e faaroo te mau mamoe i töna ra reo, ’e e pii mai oia i täna iho mau mamoe ma te faahiti i to ratou iho i’oa, a aratai atu ai ia ratou i rapae. ’E, ua hope anae täna mau mamoe i te arataihia i rapae,            e haere oia na mua ia ratou, ’e e pee mai te mau mamoe na muri iana : ua ite hoi ratou i töna reo. E ore ratou e pee i te taata ’ë, e horo ’ë atu ratou iana, aita hoi ratou i ite i te reo o te taata ’e’ë. » Ua parau atura Iesu i taua parabole nei ia ratou, aita rä i taa ia ratou te auraa o te parau täna i parau atura ia ratou. Ua parau faahou atura Iesu ia ratou : «Amene, amene, te parau atu nei au ia outou : o vau te uputa o te mau mamoe. Te mau taata atoa i haere mai na mua ia’u, e eia anae ïa ’e te haru, aita rä te mau mamoe i faaroo ia ratou. O vau te uputa ; o te na roto mai ia’u i te tomo, e ora ïa oia ; e tomo oia i roto, ’e e haere oia i rapae, ’e e noaa täna mäa. E ore te eia e haere mai, maori ra no te eia, no te taparahi ’e no te haamou roa. Ua haere mai au ia noaa ia ratou te ora, ’e ia rahi te ora e noaa mai ia ratou. »

- Haapopou tatou i te Parau a te Atua.