Dom 30 i te tau noa - A

DOMINIKA 30 i te tau noa

TAIORAA MATAMUA

« Ia hamani ino i te vahine ivi e te otare, e e rahi roa ta’u riri »

A taio tatou i te puta Exodo 22, 21-27

Teie te parau a te Fatu : « Eiaha e faatupu i te taia i te taata purutia, eiaha e faaoto atu iana, i taata purutia’toa hoi outou i te fenua ra i Aiphiti. Eiaha outou e hamani ino i te vahine ivi e te otare. Ia hamani ino noa’e outou ia ratou, e pii mai ratou ia’u ra, e e faaroo ïa vau i to ratou piiraa. E e rahi roa ta’u riri, e taparahi pohe roa ïa vau ia outou i te ôê, e e riro ta outou mau vahine ei ivi, e ta tatou mau tamarii ei otare. Ia horoa tipee oe i te moni i te taata veve io oe na, eiaha oe e titau puai i te reira mai te taata titau tarahu, eiaha oe e e faateiaha iana i te moni api. Ia rave noa’tu oe i te ahu o te taata tupu ei piri, eiaha ia mairi te mahana, e faahoi faahou atu ïa oe iana. Tirara hoi o’na tapoi, tona ïa ahu ei vehi i tona tino ; tirara hoi tona ahu ia taoto oia ; ia pii mai oia ia’u ra, e faaroo ïa vau iana, no te mea e aroha to’u. »

- O te Parau ïa a te Atua.

SALAMO 18, 2b-3, 4.20, 47.51ab

R/ Ua here ia oe, e te Fatu e, e to’u puai e.

Ua here au ia oe, e te Fatu e, e to’u puai e ;
o te Fatu to’u pâpâ e to’u haapuraa, e to’u faaora o to’u ïa Atua ;
e horo atu vau i raro ae i tona paruru, o Oia hoi to’u mato ;
to’u paruru, to’u tara faaora e to’u haapuraa maitai roa ra.

E tiaoro atu vau i te Fatu ra,
e e ora ia vau i to’u mau enemi.
O Oia tei faaora ia’u, hopoi aera oia ia’u i te vahi atea ;
ua faaora oia ia’u no te mea au au oia ia’u.

Ia ora te Fatu, e ia haamaitai hia to’u mato,
e ia faateitei hia te Atua i ora’i au nei.
E faarahi noa oia i te mau faatiamaraa hia no tona iho arii
e te faaite mai nei oia i tona here ia Davida i tei faatahinu hia e ana ra.

TAIORAA PITI

« ’E to outou faarueraa atu i te mau idolo no te fariu mai i te Atua ’e no te tavini i te Atua mau, ’e no te tiai atoa i te haereraa mai o tana Tamaiti »

A taio tatou i te epitore matamua a Paulo peata i to Tesalonia 1, 5c-10

E au mau taeae e, ’e ua ite atoa outou i to matou huru i rotopu ia outou maitai. ’E ua pee maira outou ia matou ’e i te Fatu atoa ra, inaha hoi ua faarii outou i te parau i roto i te ati rahi, ma te oaoa o te Varua-Maitai : riro atura outou ei hioraa na te feia faaroo atoa i Makedonia na ’e i Ahaia atoa nei. No ö na hoi ia outou na te parau a te Fatu i te atuturaa, eiaha i Makedonia’e i Ahaia anae nei ; ua parare rä te roo o to outou faaroo i te Atua i te vahi atoa, ’e aita atura e faufaa ia parau noa atu matou i te reira. Te parau nei hoi te taata atoa i te huru o to outou ite-maitai-raa ia’u, ’e to outou faarueraa atu i te mau idolo no te fariu mai i te Atua ’e no te tavini i te Atua mau, oia te Atua ora, ’e no te tiai atoa i te haereraa mai o tana Tamaiti mai te ra’i mai, o täna i faatia, mai roto mai i tei pohe ra, oia hoi o Iesu, o te faaora ia outou i te riri e haere mai nei.

- O te Parau ïa a te Atua.

ALLELUIA

Alleluia. Alleluia.
Ia here mai te hoe taata ia’u, e haapao oia i tä’u parau,     Ioa 14, 23
- te na reira maira te Fatu -,
e herehia oia e ta’u Metua,’e e haere atu maua iana ra.
Alleluia.

EVANELIA

« E here oe i te Fatu, tö Atua, e i tö taata tupu mai ia oe iho na »

Evanelia o Iesu-Kirito a Mataio peata 22, 34-40

I taua anotau ra, ’e, faaroo a’era te mau pharisea e, ua haamamu Iesu i te mau sadukea, ua aururu maira ratou. ’E, no te tamata iana, ua au maira te hoe o ratou : « E te orometua e, i roto i te ture, teihea te faaueraa rahi roa a’e ? » Ua pahono atura Iesu iana : « E here oe i te Fatu, tö Atua, ma tö mafatu atoa, ’e ma tö varua atoa ’e ma tö manao atoa. O te faaueraa rahi teie ’e te matamua hoi. ’E mai te reira atoa te piti : E here oe i tö taata tupu mai ia oe iho na. Tei taua tau faaueraa e piti nei te ture taatoa ’e te mau peropheta. »

- Haapopou tatou i te Parau a te Atua.