Dom 29 i te tau noa - A

DOMINIKA 29 i te tau noa

TAIORAA MATAMUA

« Ta’u i rave ia Kuro i tana rima atau ia haavi au i mua i tona aro i te mau fenua’toa »

A taio tatou i te puta a Isaia peropheta 45, 1.4-6

Teie te parau a te Fatu i tei faatahinu hia e au, ia Kuro, ta’u i rave i tana rima atau, ia haavi au i mua i tona aro i te mau fenua’toa, e ia faafariu mai i te tua o te mau arii, e e iriti au i tê mau opani i mua iana, e ore roa te mau uputa e opani hia. « No ta’u tavini, no Iakoba, e no Iseraela, ta’u i maiti, i mairi ai au i to oe ioa, ua faaau vau ia oe i ta’u Kirito, e aore oe i ite mai ia’u. O vau te Fatu, e aita’tu ; aita’tu Atua maori ra o vau nei ; ua tatua vau ia oe, e aita oe i ite mai ia’u. Ia ite te mau taata mai te hitia o te râ, e mai te tooa o te râ e, aita’tu, o vau anae ra, o vau te Fatu, e aita’tu te tahi è. »

- O te Parau ïa a te Atua.

SALAMO 95 (96.), 1.3, 4-5, 7-8, 9-10ac

R/ Ho atu i te Fatu
i te tura e te hanahana.

A himene outou i te Fatu ra i te himene api !
A himene i te Fatu, e te fenua’toa nei !
A faaite i tona hanahana i rotopu i te mau etene,
e tana ra mau ohipa taa è i rotopu i te mau nunaa’toa ra!

E rahi hoi te Fatu, e ia rahi hoi te haamaitairaa iana,
ia rahi tona mataûraa hia i to te mau atua’toa ra.
Te mau atua’toa a te mau etene, e idolo faufaa ore ïa.
Area te Fatu, nana ïa i hamani i te mau rai ra.

Ho atu i te Fatu ra, e te mau etene atoa e,
ho atu i te Fatu ra i te tura e te hanahana,
ho atu i te Fatu i te hanahana e au i tona ra io’a.

A haamori outou i te Fatu i tona ra vahi moâ.
Ia rurutaina to te fenua’toa i mua iana !
E faaite outou iô te mau atene e : « Te i te Fatu ra te hau. »
E haava oia i te mau nunaa ma te parautia.

TAIORAA PITI

« E haamanao noa matou o to outou faaroo, o to outou aroha ’e i te aho roa o to outou tiaturi »

A taio tatou i te epitore matamua a Paulo peata i to Tesalonia 1, 1-5b

O paulo, o Siluano ’e o Timoteo, i te Etaretia a to Tesalonia o te ti’a ra i roto i te Atua Metua ’e te Fatu ra ia Iesu-Kirito. Ei ia outou na te karatia ’e te hau. Ia faahiti matou ia outou i roto i ta matou mau pure, e haamaitai-tuutuu-ore ïa matou i te Atua no outou atoa na. E haamanao noa matou i te mau ohipa o to outou faaroo, i te mau tautooraa o to outou aroha, ’e i te aho roa o to outou tiaturi i te Fatu ia Iesu-Kirito, i mua i te Atua to tatou Metua. No te mea, e te mau taeae herehia e te Atua ra, ua ite matou e : ua maitaihia outou e ana. Aore hoi te Evanelia e porohia nei e matou i tae ia outou na mai te hoe noa parau, ua faaite hua rä taua Evanelia nei i töna mana na roto i te ohipa a te Varua-Maitai.

- O te Parau ïa a te Atua.

ALLELUIA

Alleluia. Alleluia.
Ia riro outou i roto i taua feia ra mai te tiarama no te ao nei,     Phil 2, 15d.16a
te hopoi na hoi outou i te ao nei i te parau e ora ai ra.
Alleluia.

EVANELIA

« A faahoi atu maoti i ta Kaisara ra ia Kaisara, ’e i ta te Atua ra i te Atua »

Evanelia o Iesu-Kirito a Mataio peata 22, 15-21

I taua anotau ra, haere atura te mau pharisea e apoo, no te imi i te hoe ravea e noaa ai Iesu ia ratou, na roto i täna iho parau. Tono maira ratou iana i ta ratou mau pipi, ’e te mau herodiani, na ö maira : « E te orometua e, ua ite matou e, e taata parau mau oe, ’e e haapii oe i te haerea o te Atua ma te parau mau ’e te hirahira ore i te taata, e ore hoi oe e haapao noa a’e i te huru o te taata. Teienei, a faaite mai na oe i to oe manao : e mea ti’a anei ia aufau atu i te tute a Kaisara ? » Ua ite rä Iesu i to ratou täiroiro, ua na ö atura oia ia ratou : « E teie nei feia haavare e, e aha outou e tamata mai ai ia’u ? A faaite mai na i te moni aufau tute. » Ua faaite maira ratou i te hoe denari. Ua ui atura oia ia ratou : « No vai teie hohoa ’e te io’a i papaihia i nia iho ? » Ua pahono maira ratou : « No Kaisara. » Ua parau atura Iesu ia ratou : « A faahoi atu maoti i ta Kaisara ra ia Kaisara, ’e i ta te Atua ra i te Atua. »

- Haapopou tatou i te Parau a te Atua.