DOMINIKA 27 i te tau noa

TAIORAA MATAMUA

« O taua ô vine ra a te Fatu o te mau nuu, o te utuafare o Iseraela ïa »

A taio tatou i te puta a Isaia peropheta 5, 1-7

E himene au i ta’u here i te hoe pehe a ta’u metua fetii no tana ra ô vine. E ô vine ta ta’u here i nia i te vahi teitei te hotu rahi i te olive. E ua aua ihora oia, e ua iriti i te mai ofai i rapae, e ua tanu i te ohi maitai, e ua patu i te pa i opu, e ua hamani i te neneiraa i roto, mai te tiaturi ia faahotu i te vine mau, e e vine avaava tana i hotu mai. I teienei, o outou te parahi i Ierusalema, e outou te mau taata no Iuda, a haava outou i ropu ia’u e i ta’u ô vine. E aha tei toe i tei au ia rave hia e au i ta’u ô vine, e aore i rave hia e au ? Maori ra e ia tiaturi au i tona hoturaa i te vine mau ; eiaha ia hotu i te vine avaava. I teienei e faaite au ia outou i ta’u ravea i ta’u ô vine ; e faarue au i te aua, e e pau ïa i te eia ; e vavahi au i te patu, e e tataahi hia ïa. E faaano au iana, e ore hoi e tope hia, e e ore hoi e ô hia, e e tupu te raau taratara e te tataramoa, e e faaue au i te mau ata eiaha ia haamairi i te ua i nia iana. O taua ô vine ra a te Fatu o te mau nuu, o te utuafare o Iseraela ïa ; e te taata no Iuda, tana ïa ohi popou ; e ua tiaturi oia i te parau au, e inaha o te parau ino tei itea ; o te parautia tei opua hia, e o te aue tei faaroo hia.

- O te Parau ïa a te Atua.

SALAMO 79 (80.), 9.12, 13-14, 15-16a, 19-20

R/ Ô vine ra a te Fatu o te mau nuu,
o te utuafare o Iseraela ïa.

E ô vine ta oe i rave mai mai Aiphiti maira :
ua huri oe i te etene i vaho, e ua tanu ihora i te reira.
Ua toro tona amaa i tahatai,
e tona tihitihi i te anavai ra.

E aha hoi oe i vavahi ai i te aua,
i pofai hia’i oia e te feia’toa e haere nei,
i etu hia’i e te puaa o te aru ra,
e i amu hia’i e te mau puaâ faaapu ?

A hoi mai, e te Fatu, te Atua no te mau nuu,
a hio mai mai te rai mai, ia ite,
a mataitai i teienei ô vine :
a paruru oe iana, oia i tanu hia e to rima atau !

E ore roa matou e taiva ia oe ;
na oe matou e faaanaanaea, ia taû atu â matou i to oe na io’a.
a faafariu mai ia matou, e te Atua no te mau nuu, e te Fatu e,
ia anaana mai to mata na, e eora ïa matou !

TAIORAA PITI

« O te reira ïa ta outou e rave. Ei reira te Atua hau e parahi mai ai i pihai iho ia outou »

A taio tatou i te epitore a Paulo peata i to Philipi 4, 6-9

E au mau taeae e, eiaha to outou manao ia tapitapi i te hoe noa a’e mea. E pure rä outou no te mau mea atoa, ’e e faaite i te Atua i ta outou mau aniraa, na roto i te ta’uraa ma te haamaitai. Ei reira ïa te hau o te Atua, o tei hau ’ë atu i te feruriraa taata, e tiai mai ai i to outou mau mafatu ’e i to outou mau manao i roto ia Iesu-Kirito. ’E teienei, e au mau taeae, te mau mea tura, te mau mea atati’a, te mau mea mä, te mau mea e au ia hinaarohia ’e ia faaturahia, te mau mea e parauhia i te viretu, te mau mea e au ia haamaitaihia, o te reira ïa ta outou e haapao. Te mau mea i haapiihia e au, te mau mea ta outou i faaroo no roto mai i ta’u vaha ’e ta outou i ite i roto ia’u, o te reira ïa ta outou e rave. Ei reira te Atua hau e parahi mai ai i pihai iho ia outou.

- O te Parau ïa a te Atua.

ALLELUIA

Alleluia. Alleluia.
O vau rä tei maiti ia outou,                 cf. Ioa 15, 16
’e tei faataa ia outou, ia haere outou,
’e ia hotu mai i te mäa, ’e ia vai maite to outou hotu.
Alleluia.

EVANELIA

« ’E e tarahu oia i taua ’ö vine ra i te tahi atu mau taata faaapu »

Evanelia o Iesu-Kirito a Mataio peata 21, 33-43

I taua anotau ra, ua parau atura Iesu i te mau tahu’a rarahi ’e i te feia paari o te nunaa iana ra : « A faaroo mai na i te tahi ä parabole : ua tanu ihora te hoe fatu fenua i te hoe ’ô vine. Ua aua ihora oia i taua ’ô vine ra, ’ö ihora i te hoe nene’iraa vine, ’e faatia a’era i te hoe pä tiairaa. Ua tarahu atura oia i taua ’ö vine ra i te taata faaapu vine, ’e ua reva atura i te hoe fenua ’ë. ’E, fatata a’era te anotau auhune ra, ua tono atura oia i töna mau tavini i te feia faaapu, ia roaa mai täna tuhaa mäa. Ua haru maira te feia faaapu i taua mau tavini ra, papa’i maira i te hoe, taparahi maira i te tahi, pëhi maira i te tahi ä i te ofai. Ua tono faahou atura oia i te tahi ä mau tavini, e rahi a’e ratou i tei mutaa iho mau tavini, ’e ua na reira atoa maira te feia faaapu. I te hopea roa, tono atura oia i täna tamaiti ia ratou ra, na ö ihora : “E riro ratou i te faatura i ta’u tamaiti.” I to ratou rä iteraa i te tamaiti, ua parau a’era taua mau taata faaapu ra : “O te taata ’äi’a teie, tatou e taparahi iana, ia mahere roa mai ia tatou töna fenua ’äi’a.” Haru maira ratou iana, hopara atura iana i rapae i te ’ö vine, ’e ua taparahi pohe roa atura ratou iana. Ia haere maira te fatu o taua ’ö vine ra, e aha atura oia i taua mau taata faaapu ra ? » Ua parau maira ratou : « E rave ino oia i taua mau taata iino ra e pohe roa atu ratou, ’e e tarahu oia i taua ’ö vine ra i te tahi atu mau taata faaapu, o te afai i te mäa i te tau mau ra. » Ua na ö atura Iesu ia ratou : « Aita ä outou i taio a’enei i teie parau i papaihia ra : Te ofai i haapaehia e te feia patu ra, ua riro ïa ei ofai tihi. Na te Fatu te reira i rave, ’e te hio nei tatou ma te umere ? No reira, te parau atu nei au ia outou e : e hopoi-’ë-hia te Basileia o te Atua ia outou, a tuuhia atu ai i te hoe nunaa o te faahotu mai i töna mäa. »

- Haapopou tatou i te Parau a te Atua.