Dom 23 i te tau noa - A

DOMINIKA 23 i te tau noa

TAIORAA MATAMUA

« Ia ore oe e faaara i te paieti ore, e titau vau i tona toto ia oe »

A taio tatou i te puta a Ezekiela peropheta 33, 7-9

Ua tae mai te parau a te Atua ia’u nei : « E o oe, e te tamaiti a te taata, ua faariro au ia oe ei hiopoa no te utuafare o Iseraela ; e tenana, a faaroo na oe i te parau no roto mai i ta’u vaha, e faaite oe ia ratou i te reira no ô nei atu ia’u nei. Ia parau au i te taata paieti ore : “E te taata paieti ore, e pohe oe i te pohe roa raa”, e aore oe i parau atu ia fariu è atu te paieti ore i tona èâ ino ; e pohe ïa te paieti ore i roto i tana iho hara, e titau râ vau i tona toto i to oe ra rima. Area ia faaite oe i te taata paieti ore ia fariu è atu oia i tona mau èâ, e aore râ oia i fariu è atu i tona èâ, e pohe oia i roto i tona ino ; o oe râ ua faaora ïa i to varua. »

- O te Parau ïa a te Atua.

SALAMO 94 (95.), 1-2, 6-7ab, 7d-8a.9

R/ I teienei, eiaha e faaetaeta i to outou mafatu,
a faaroo ana’e i te reo o te Fatu !

A haere mai outou, a haamaitai tatou i te Fatu ma te oâoâ,
a himene hua tatou i te mato a ora’i tatou nei ;
E haere tatou i mua i tona aro ma te haamaitai,
e ma te salamo e himene hua’tu ai iana.

A haere mai outou, e a haamori tatou, e tahopu ;
e tuu i to tatou turi i mua i te Fatu tei hamani mai ia tatou nei !
O oia hoi to tatou Atua,
o tatou hoi te taata o tana ra.

I teienei mahana, ia tia ia outou te faaroo i tona ra reo :
« Eiaha e faaetaeta i to outou na mafatu mai te i Meriba ra,
e mai te i te mahana i Masa, i te medebara ra,
a faaooo mai ai to outou huimetua ia’u ra, e ua ââ mai ia’u. »

TAIORAA PITI

« Te taata hoi e here ia vetahi ’ë ra, ua haapao ïa i te ture taatoa »

A taio tatou i te epitore a Paulo peata i to Roma 13, 8-10

E au mau taeae e, eiaha ei tarahu ta outou i te taata, maori ra te here te tahi i te tahi, te taata hoi e here ia vetahi ’ë ra, ua haapao ïa i te ture taatoa. No te mea teie mau faaueraa : Eiaha oe e faaturi, eiaha oe e taparahi i te taata,eiaha oe e eia, eiaha oe e nounou. ’E te vai atu ra ä, ua haapoto-anae-hia ïa i roto i teie nei parau : E here oe i tö taata tupu, mai ia oe iho na. E ore roa te here e hamani ino i te taata tupu. No reira, e hope te ture taatoa i roto i te here.

- O te Parau ïa a te Atua.

ALLELUIA

Alleluia. Alleluia.
No te mea na te Atua i fa’afäite i to ao nei iana iho      cf. 2 Kor 5, 19
na roto i te Kirito,
’e nana i tuu mai i te parau fa’afäite i roto i ta’u vaha.
Alleluia.

EVANELIA

« Ia faaroo mai oia ia oe ra, auaa a’e ïa oe i noaa mai ai tö taeae »

Evanelia o Iesu-Kirito a Mataio peata 18, 15-20

I taua anotau ra, te parau r? Iesu i t?na mau pipi : « Ia hara noa atu tö taeae ra, e haere oe e a’o iana, orua anae ïa. Ia faaroo mai oia ia oe ra, auaa a’e ïa oe i noaa mai ai tö taeae. Ia ore rä oia e faaroo mai ia oe, a rave atoa ïa i te hoe taeae, ’e aore rä, e toopiti na muri ia oe, ia faaotihia te mau ohipa atoa i te parau o na ite toopiti ’e tootoru. ’E, ia ore oia e faaroo ia raua, a faaite atu ïa i te Etaretia, ’e ia ore atoa oia e faaroo i te Etaretia, ia riro ïa oia no oe mai te etene ’e te telona. Oia mau tä’u e parau atu nei ia outou na, te mau mea atoa ta outou e taamu i te fenua nei, e taamu-atoa-hia ïa i nia i te ra’i ; ’e te mau mea atoa ta outou e tatara i te fenua nei, e tatara-atoa-hia ïa i nia i te ra’i. Te parau atu nei ä vau ia outou : ia faaau e toopiti ia outou na i te fenua nei i te parau ta raua e ani, e horoahia mai ïa ia raua e ta’u Metua i te ra’i ra. I te vahi hoi e amui ai e toopiti, ’e aore rä, e tootoru ma tö’u nei i’oa, tei rotopu atoa ïa vau ia ratou i reira. »

- Haapopou tatou i te Parau a te Atua.