Dom 22 i te tau noa - A

DOMINIKA 22 i te tau noa

TAIORAA MATAMUA

« Te parau a te Fatu ia’u ei faainoraa »

A taio tatou i te puta a Ieremia peropheta 20, 7-9

Ua tamata oe ia’u, e te Fatu e, e ua vare au ; ua hau to puai i to’u, e ua upootia oe ; ua riro au ei ataraa i te ahana’toa nei, e ua tahitohito anae ratou ia’u. No te mea ua maoro aenei ta’u e parau nei, ma te faahapa i te ino, e te pii nei au i te pau ; e ua riro te parau a te Fatu ia’u ei faainoraa, e ei tahitohitoraa, i te mahana’toa nei. E ua parau au : eita vau a haamanao faahou iana, eita vau e parau faahou i tona ra ioa ; e ua riro atura i roto i to’u mafatu mai te auahi ama, e ua opani hia i roto i to’u mau ivi ; rohirohi aera vau, aita e nehenehe ia faaoromai.

- O te Parau ïa a te Atua.

SALAMO 62, 2, 3-4, 5-6, 8-9

R/ Ua poia tau varua ia oe,
e te Fatu e, e tau Atua e !

E te Atua e, e tau Atua e, te imi nei au ia oe,
ua poia tau varua ia oe.
Te oriorio nei to’u tino no oe,
mai te fenua marô e te poia e te pape ore.

Te hinaaro nei au e hio ia oe i te vahi moà ra,
e ite i to mana e i to hanahana.
Mea au ae to aroha i te ora,
e umere to’u utu ia oe.

Te hinaaro nei au e haamaitai ia oe i to’u oraraa taatoa,
e faateitei au i tau rima i ta oe na ioa.
E maha tau varua ia oe mai tei te toahua e te mei.
E arue atu tau vaha ïa ma te oaoa.

O oe hoi tei tauturu mai ra ia’u,
e teienei te oâoâ nei au i to maru pererau.
Te piri atu nei tau varua ia oe,
o to rima atau hoi to’u turu.

TAIORAA PITI

« Ia püpü outou mau tino ei tutia ora »

A taio tatou i te epitore a Paulo peata i to Roma 12, 1-2

E au mau taeae e, te a’o atu nei au ia outou, no te aroha rahi o te Atua, ia püpü outou mau tino ei tutia ora, ’e te mo’a ’e te au hoi i te Atua. O te haamoriraa varua ïa e au ia outou. E eiaha to outou huru ia au i to teie nei ao, ia faahuru-’ë-hia rä outou i te faaapiraa o to outou maramarama. Ei reira ïa outou e ite ai i te hinaaro o te Atua : i te mea ti’a, i te mea e mauruuru ai oia, i te mea hoi e hau roa atu i te maitai.

- O te Parau ïa a te Atua.

ALLELUIA

Alleluia. Alleluia.
Ia ti’a i te Metua o to tatou Fatu o Iesu-Kirito, cf. Eph 1, 17-18
ia maramarama te mata o to outou mafatu,
ia ite outou i te tiaturi i noaa mai ia outou no tana nominoraa.
Alleluia.

EVANELIA

« I hinaaro te tahi taata i te pee mai ia’u, e faarue oia iana iho »

Evanelia o Iesu-Kirito a Mataio peata 16, 21-27

I taua anotau ra, mai reira ma ä, haamata ihora Iesu i te faaite i tana mau pipi e : ia haere oia i Ierusalema e ti’a ai, ’e ia rahi töna mau hamani-ino-raa-hia e te feia paari, te tahu’a rarahi ’e te papai parau, ’e ia taparahi-pohe-roa-hia oia, a tiafaahoi ai i te toru o te mahana. Ua rave maira Petero iana, ’öpa’i a’era i te hiti, ’e ua a’o maira : « Ia paruruhia mai oe, e te Fatu e, eiaha roa oe ia na reirahia mai. » Area Iesu, ua fariu a’era ïa mure i muri, ’e ua ’avau atura ia Petreo, na ö atura : « Haere oe na muri ia’u, e Satane, e turoriraa oe na’u. E ere hoi to oe manao i to te Atua, no te taata rä. » Ua parau atura Iesu i tana mau pipi : « I hinaaro te tahi taata i te pee mai ia’u, e faarue oia iana iho, a rave ai i tana tatauro, a pee mai ai ia’u. O tei hinaaro hoi i te tapea i töna ora ra, e ere oia i te ora ; o te tuu rä i töna ora no’u nei, e roaa ïa iana töna ora. ’E e aha ta te taata nei faufaa, ia roaa noa atu iana te ao taatoa nei, ’e ia ere i te ora ? ’E e aha ta te taata nei e horoa ei hoo i töna iho ora ? E haere mai hoi te Tamaiti a te taata nei ’e tana mau melahi atoa, ma te hanahana o töna ra Metua. Ei reira oia e faautua ai i te taata atoa, mai te au i ta ratou ohipa. »

- Haapopou tatou i te Parau a te Atua.