Dom 21 i te tau noa - A

DOMINIKA 21 i te tau noa

TAIORAA MATAMUA

« E tuu au i te taviri no te utuafare o Davida i nia i tona tapono »

A taio tatou i te puta a Isaia peropheta 22, 19-23

Te parau a te Fatu i parauhia i te tavana ra ia Shebena : « E tiahi è vau ia oe i to oe vahi, e iriti au ia oe i to oe toroa. E i te reira mahana e parau atu au i ta’u tavini ia Eliakima, te tamaiti a Helikia. E faaahu au iana i te ahu no oe, e faaetaeta vau iana i te tatua no oe ra, e tuu au i to oe mana i roto i tana rima : e e riro oia mai te metua te huru no te taata o Ierusalema e no te utuafare o Iuda. E tuu au i te taviri no te utuafare o Davida i nia i tona tapono ; e iriti oia, e ore te tahi è e opani ; e opani oia, e ore roa te tahi è e iriti. E haamau au iana, mai te patia i te vahi etaeta, e e riro oia mai te terono unauna no te utuafare o tona metua. »

- O te Parau ïa a te Atua.

SALAMO 137, 1-2a, 2bc-3, 6.8bc

R/ E tia to aroha, e te Fa tu e, i te vai maiteraa, e a muri noa’tu :
eiaha oe e faaea i te ohipa a to rima nei.

Te haamaitai atu nei au ia oe, e te Fatu e, ma to’u mafatu atoa nei ;
ua faaroo oe i te mau parau a to’u nei vaha.
I mua i te aro o te mau merahi ra,
te tipapa nei au ma te hio i to oe nao mo’â ra.

No to oe na aroha e ta oe na parau mau ;
ua hau atu â ta oe parau fafau i to oe iho na roo maitai ;
i te mahana i tiaoro atu ai au ia oe ra, ua faaroo mai oe ia’u ;
ua faarahi mai oe i te itoito i roto i to’u nei varua.

Teitei noa’tu te Fatu, te ite mai nei oia i te feia haehaa ;
area tei teitei râ, e i te atea è ïa, oia e hio mai ai.
E tia to aroha, e te Fatu e, i te vai maiteraa, e a muri noa’tu ;
eiaha oe e faaea i te ohipa a to rima nei.

TAIORAA PITI

« Hoi te mau mea atoa ra,, nona mai ïa ’e nana ’e nona hoi »

A taio tatou i te epitore a Paulo peata i to Roma 11, 33-36

’Auë te hohonu rahi o te paari ’e o te ite faufaa hau a’e o te Atua ! ’Auë täna mau opuaraa i te parau ’aro rahi e ! ’Auë töna mau haerea i te itea ore ia imi ! O vai hoi tei ite i te manao o te Fatu, ’e o vai tei a’o atu iana ? O vai hoi tei horoa atu na i täna na te Fatu ia tahoo-faahou-hia mai oia ? Inaha hoi te mau mea atoa ra, nona mai ïa ’e nana ’e nona hoi. Ei iana ra te hanahana e a tau a hiti noa atu ! Amene.

- O te Parau ïa a te Atua.

ALLELUIA

Alleluia. Alleluia.
O Petero oe,                                                                                   Mat 16, 18
oia hoi e papa ’e ei nia iho i taua papa na e patu ai au i ta’u Etaretia,
’e e ore roa te mana o te pohe e upootia i nia iana.
Alleluia.

EVANELIA

« E horoa atu vau ia oe i te mau taviri o te Basileia o te ra’i »

Evanelia o Iesu-Kirito a Mataio peata 16, 13-20

I taua anotau ra, ’e, tae atura ratou i te fenua o Kaisarea o Philipa, ua ui atura Iesu i täna mau pipi : « O vai au i ta te taata parauraa ? » Ua pahono maira ratou : « I ta te tahi pae taata ra, o Ioane-Papetito ïa ; i ta te tahi atu pae, o Elia ; i ta te tahi atu ä, o Ieremia, e aore rä, o te hoe o te mau peropheta. » Ua parau atura Iesu : « O vai rä vau i ta outou na parauraa ? » Ua pahono maira Simona Petero, na ö maira : « O te Kirito oe, te Tamaiti a te Atua ora ra. » Ua parau atura Iesu iana : « E ao to oe, e Simona, tamaiti na Ioane e, e ere hoi na te tino ’e na te toto te reira i heheu mai ia oe, na tö’u rä Metua i te ra’i ra. O vau nei rä, te parau atu nei ïa ia oe : o Petero oe, oia hoi e papa ’e ei nia iho i taua papa na e patu ai au i ta’u Etaretia, ’e e ore roa te mana o te pohe e upootia i nia iana. E horoa atu vau ia oe i te mau taviri o te Basileia o te ra’i ; ’e o ta oe e taamu i te fenua nei, e taamu-atoa-hia ïa i te ra’i ; ’e o ta oe e tatara i te fenua nei, e tatara-atoa-hia ïa i te ra’i. » ’E ua a’o atura Iesu i te mau pipi, eiaha roa atu ratou e faaite i te taata e, o te Kirito oia.

- Haapopou tatou i te Parau a te Atua.