DOMINIKA 19 i te tau noa

TAIORAA MATAMUA

« A haere oe, e i nia i te moua tia noa’i i te aro o te Fatu »

A taio tatou i te puta toru o te mau Arii 19, 9a.11-13a

I taua mau mahana ra, a tae ai oia i reira, parahi ihora oia i roto i te hoe ana, e ao te rui iana. Naô ihora Oia iana : « A haere oe, e i nia i te moua tia noa’i i te aro o te Fatu. » E inaha, ua haere te Fatu na reira ihora, o te matai rahi maira e te puai e au i ahuri i te moua e ia haaparari i te mato i mua i te Fatu, aita râ te Fatu i roto i taua matai ra ; e mure aera te matai, o te aueueraa fenua mai ïa, aita râ te Fatu i roto i te aueueraa. E oti aera te aueueraa, e auahi ïa ; aita râ te Fatu i roto i te auahi ; e i muri mai i te auahi, e puaiai o te hoe maa matai iti. Ia faaroo Elia i te reira ua haapurou oia i tona ra mata i te ahu ; haere atura oia i rapaeau ra, tia noa ihora i te tomoraa o te ana ra.

- O te Parau ïa a te Atua.

SALAMO 84 (85.), 9ab.10, 11-12, 13-14

R/ A faaite mai, e te Fatu e, i to oe na aroha ia matou,
e a ho mai i te ora na oe na ia matou nei.

E faaroo vau ! E aha ta te Fatu ra parau ?
O te hau hoi tana e faaite mai i tona ra nunaa, e tona ra feiamoâ.
Te fatata maira tona ora i te feia e mataû iana ra,
e e tupu â te Hanahana i to tatou nei fenua.

O te aroha e te parau mau, ua farerei ïa raua,
o te Parautia e te Hau ua hohoi ïa ;
e tupu mai te Parau mau no roto i te fenua,
e, e hio mai te Parautia mai te rai mai.

Na te Fatu hoi e horoa mai i te maitai,
e e hotu mai â to tatou nei fenua i te maâ ;
e haere â te Parautia na mua iana,
e e haere hoi te Hau na muri iana.

TAIORAA PITI

« E ti’a hoi ia’u ia anatemahia vau, no tö’u mau teaae »

A taio tatou i te epitore a Paulo peata i to Roma 9, 1-5

E au mau taeae e, e parau mau tä’u i te Kirito. Te faaite mai nei ta’u manava, o tei haapiihia e te Varua-Maitai : aore au e haavare nei. E oto rahi tö’u, ’e e mauiui rahi tei roto i tö’u mafatu. E ti’a hoi ia’u ia anatemahia vau ’e ia faataa-’ë-hia vau i te Kirito no tö’u mau teaae, no tö’u mau fetii i te haapaoraa i te tino nei. E Ati-Iseraela ratou, no ratou te faatävairaa ’e te hanahana, na ratou te mau faufaa ’e te ture ’e te haamoriraa e te mau parau i fafauhia ra. No ratou atoa hoi te mau metua, ’e no ratou te Kirito i te haapaoraa i te tino nei, o oia te Atua i nia i te mau mea atoa ; ia haamaitaihia oia e a tau a hiti noa atu. Amene.

- O te Parau ïa a te Atua.

ALLÉLUIA

Alléluia. Alléluia.
Te tiaturi nei au, e te Fatu e,      cf. Sal 129, 5
te tiaturi nei au i ta oe na parau.
Alléluia.

EVANELIA

« A faaue mai ia haere atu vau ia oe, na nia i te ’are »

Evanelia o Iesu-Kirito a Mataio peata 14, 22-33

I reira ihora, ua faaue atura Iesu i tana mau pipi e haere i nia i te poti, ’e e tere na mua iana i te tahi hiti roto, a faahoi ai oia i te tiaa rahi taata. ’E, ia tuuhia atura te tiaa rahi e ana ra, haere atura oia i nia i te mou’a, i te vahi ano, e pure. E pö ihora, o oia anae tei taua vahi ra. Ua huru atea ïa te poti, e tau hanere metera i terehia na. Te papa’i-haere-hia ra te poti e te mataare, te na mua mai ra hoi te mata’i. ’E, tae a’era i te maha o te araraa o te ru’i, haere atura Iesu na nia i te ’are. Ia ite maira te mau pipi iana i te haere-noa-raa na nia i te ’are, huehue roa atura ratou, na ö a’era : « E tupapau. », ’e ua ’aue ihora i te mata’u. Ua parau atura rä Iesu ia ratou, i reira ra, na ö atura : « Faaitoito, o vau teie, eiaha e mata’u » Ua pahono maira Petero : « E te Fatu, o oe tena ra, a faaue mai ia haere atu vau ia oe, na nia i te ’are. » Ua parau atura Iesu : « Haere mai ! » Pou ihora Petero i raro i te miti, haere atura ia Iesu, na nia i te ’are. I töna rä iteraa i te ’u’ana o te mata’i, mata’u ihora oia, ’e, te mure ra oia i raro i te miti, ua pii maira oia : « E te Fatu, a faaora mai ia’u ! » Faatoro atura Iesu i tana rima i reira ra, ’e ua haru atura iana, na ö atura : « E teie nei taata faaroo tapetepete e, e aha oe i feaa ai? » ’E, tae atura raua i nia i te poti, pohe ihora te mata’i. Tahopu maira to roto i te poti i mua ia Iesu, na ö maira : « Oia mau, o te Tamaiti oe a te Atua ! »

- Haapopou tatou i te Parau a te Atua.