DOMINIKA 17 i te tau noa

TAIORAA MATAMUA

« Ua ani mai râ oe te paari no oe »

A taio tatou i te puta toru o te mau Arii 3, 5.7-12

I taua mahana mau ra, i nia i te fata i Gabaona, fâ maira te Fatu ia Salomona ite taoto i te po, i te naôraa e : « A faaite mai i ta oe ra hinaaro, ia horoa’tu au ia oe. » Ua parau atura Salomona : « E teienei, e te Fatu, te Atua e, ua faariro oe i to tavini ei arii ei mono no ta’u metua ra no Davida ; area râ e tamaiti api au tei ore i ite i te huru e au, no ta’u haerea i rapae e no ta’u haerea i roto. Te i ropu hoi to tavini nei i te nunaa ta oe i maiti, e nunaa numera ore, te ore e tia ia taio e ia tatau no te rahi. No reira ei mafatu faaroo ohie ta oe e horoa mai i to tavini nei, ia tia iana e haava i to nunaa, e ia taa iana te huru o te maitai e o te ino ; o vai hoi te tia ia haava i teienei nunaa, to oe ra nunaa rahi roa ra. » Mauruuru atura te Fatu i te parau ta Salomona i ani mai iana ra. Ua parau atura te Fatu ia Salomona : « No te mea ua na reira mai ta oe aniraa, e ore oe i ani ia haamaoro hia to oe pue mahana, aore atoa i te taoa, e te pohe o to mau enemi ; ua ani mai râ oe te paari no oe, ia ite oe i te mea tia ; inaha, ua faatia vau i to oe mau hinaaro, e ua horoa’tu au ia oe i te mafatu paarii e te maramarama, aita e faito ia oe te hoe i mutaaiho,e eita hoi e faito te tahi i muri ae ia oe. »

- O te Parau ïa a te Atua.

SALAMO 118, 57.72, 76-77, 127-128, 129-130

R/ Aue, o to’u here i ta oe na ture, e te Fatu e !

E te Fatu e, o ta’u nei tuhaa, ua parau vau,
o te haapao maite ïa i ta oe na mau parau.
E maitai no’u te ture a to vaha na hau roa,
i te auro e te ario e mirioni noa’tu.  

Ia riro to oe na here ei tamahanahana ia’u
mai te au i to poroi i to tavini nei.
Ia tae mai to here rahi i nia ia’u,
e e ora ïa vau.

I rahi ai to’u hinaaro i ta oe mau faaueraa,
hau ae i te hinaaro i te auro e tae roa’tu i te auro ma roa.
I pee ai au i ta oe mau faaueraa’toa
e te au ore nei au i te mau èà-toa o te haavare.

E ohipa maere ta oe ra mau parau i faaite maira,
i haapao ai ta’u varua i te reira.
I te heheuraa hia mai o ta oe na parau e noaa’i te maramarama,
e haroaroa te feia riirii i te reira.

TAIORAA PITI

« O tatou ä täna i haapao atea ia faaauhia i te hohoa o täna Tamaiti »

A taio tatou i te epitore a Paulo peata i to Roma 8, 28-30

E au mau taeae e, ’e ua ite atoa tatou e : te faariro nei te Atua i te mau mea atoa ei maitai no te feia e here iana ra. O ratou hoi täna i aroha mai mua mai ä, o ratou ä täna i haapao atea ia faaauhia i te hohoa o täna Tamaiti, ia riro oia, ei matahiapo no taeae e rave rahi. ’E o ratou täna i haapao atea ra, o ratou ä täna i nomino, ’e o täna i nomino ra, o täna atoa ïa i faariro ei feia parautia, ’e o täna i faariro ei feia parautia ra, o täna atoa ïa i faahanahana.

- O te Parau ïa a te Atua.

ALLELUIA

Alleluia. Alleluia.
Te arue atu nei au ia oe, e te Metua e, cf. Mat 11, 25
te Fatu o te ra’i ’e o te fenua nei,
’e ua heheu mai i te feia rii
te mau parau moe o te Basileia !
Alleluia.

EVANELIA

« Hoo atura oia i täna atoa ra, hoo maira i taua aua ra »

Evanelia o Iesu-Kirito a Mataio peata 13, 44-52 [Taioraa haapotohia: 44-46]

I taua taime ra, ua parau atura Iesu i teie mau parabole i te tiaa rahi taata : « ’E au te Basileiao te ra’i i te hoe pu’e’a taoa i hunahia i roto i te hoe aua, ’e, ia itea ihora i te hoe taata, huna faahou ihora taua taata ra, ’e, no töna oaoa, hoo atura oia i täna atoa ra, hoo maira i taua aua ra. E aore ra : E au ä te Basileia o te ra’i i te hoe taata hoohoo, o te imi ra i te poe matau’ui’i. ’E, itea ihora iana te hoe poe maitai hau a’e, haere atura oia, hoo atura i täna atoa ra, hoo maira i taua poe ra. E faaea te taioraa haapotohia i onei.

E au atoa hoi te Basileia o te ra’i i te hoe ’upe’a i tuuhia i raro i te miti ’e o tei ati i te i’a huru rau. E ati a’era, ua umehia maira i uta. Parahi ihora te mau ravaai, ’e haaputu ihora i te i’a maitatai i roto i te ’ara’ïri, ’e ua faarue atura i te i’a iino. Oia atoa ia tae i te hopea o teie nei ao, e ti’a mai te mau melahi, e faataa ’ë ratou i te feia iino ’e te feia parautia. ’E e huri i te feia iino i roto i te umu auahi ; ei reira te oto ’e te ’au’auraa niho. Ua taa anei ia outou taua mau parau atoa ra ? » Ua pahono maira ratou : « Ë ». Ua parau atura oia : « No reira, te papai parau i haapiihia i te parau no te Basileia o te ra’i, e au ïa i te fatu utuafare e rave mai no roto mai i täna pu’e’a taoa i te mea api ’e i te mea tahito. »

- Haapopou tatou i te Parau a te Atua.