DOMINIKA 16 i te tau noa

TAIORAA MATAMUA

« A haava’i hoi oe na, te tuu atoa mai na oe i te vahi tatarahaparaa i te hara »

A taio tatou i te puta a te Paari 12, 13.16-19

Aita’tu hoi e Atua maori ra o oe anae ra, o te haapao i te taata’toa nei, ia faaite hoi oe, aore ta oe na mau faaaura parau i rave hia ma te tia ore. O to mana na hoi te matamehai o te parautia, e no te mea e, o oe te Fatu o te mau mea’toa nei, te faaherehere mai nei oe ia ratou ra. Te faaite maira oe i to mana i te taata tei ore i faaroo e te ia oe te mana hope, e te faahaama maira oe i te teoteo o tei ore i ite ia oe na. No te mea râ e, o oe te fatu o te mana te haere mai na oe ma te maru, e te faatere na oe ia matou ma te faaherehere rahi, te tia ra hoi ia oe te haapao i to mana, ia hinaaro oe. Ua na roto râ i taua mau ohipa ra ta oe haapiiraa mai i to oe nei mau taata ia riro ratou ei feia parautia e te aroha, e a tuu mai hoi oe i te tiaturiraa maitai i to mau tamarii nei ; a haava’i hoi oe na, te tuu atoa mai na oe i te vahi tatarahaparaa i te hara.

- O te Parau ïa a te Atua.

SALAMO 85 (86.), 5-6, 9ab.10, 15-16ab

R/ Te aroha na hoi oe e te maitai,
e faaroo mai, e te Fatu e, i ta’u nei pure.

Te aroha na hoi oe e te maitai, e te Fatu e,
e te aroha rahi i te feia’toa e tiaoro atu ia oe na ;
e faaroo mai, e te Fatu e, i ta’u nei pure,
e a haapao mai i te reo o ta’u nei otoraa.

Te mau nunaa’toa
e haere mai ïa e haamori ia oe, e te Fatu e,
e rahi hoi oe, e ohipa taa è ta oe e rave na,
o oe anae ra te Atua.

O oe râ, e te Fatu e, e Atua hamani maitai oe, e te aroha,
e te faaoromai roa, te rahi hoi i te faaherehere e te parau mau,
e hio mai â oe ia’u,
e a aroha mai ia’u !

TAIORAA PITI

« Na te Varua rä e ani na roto i te uururaa e ore e ti’a ia parau »

A taio tatou i te epitore a Paulo peata i to Roma 8, 26-27

E au mau taeae e, ’e te turu atoa nei te Varua i to tatou paruparu, aita hoi tatou i ite i te pure ma te au maitai. Na te Varua rä e ani no tatou, na roto i te uururaa e ore e ti’a ia parau. Area oia o te paheru i te mafatu, ua ite ïa i te hinaaro o te Varua : e au hoi täna pure no te feia mo’a i te hinaaro o te Atua.

- O te Parau ïa a te Atua.

ALLELUIA

Alleluia. Alleluia.
Te arue atu nei au ia oe, e te Metua e,  cf. Mat 11, 25
te Fatu o te ra’i ’e o te fenua nei,
’e ua heheu mai i te feia rii
te mau parau moe o te Basileia !
Alleluia.

EVANELIA

« E vaiiho noa ia tupu apipiti noa ana e tae noa atu i te ootira sitona »

Evanelia o Iesu-Kirito a Mataio peata 13, 24-43 [Taioraa haapotohia : 24-30]

I taua taime ra, ua tuu atura Iesu i te tahi ä parabole, na ö atura : « E au te Basileia o te ra’i i te hoe taata i ueue i te huero maitai i roto i täna faaapu. Teienei rä, a taoto noa ai te taata, ua haere maira töna enemi, ’e ua ueue ihora i te zizania i te vahi i ueuehia ai te sitona ’e ua haere ’ë atura. ’E, tupu a’era te raau rii ’e hotu ihora, itea-atoa-hia ihora te zizania. Haere maira te mau tavini o te fatu utuafare iana ra, na ö maira : “E te Fatu, e ere anei i te huero maitai ta oe i ueue i roto i ta oe faaapu ? Nofea ihora ïa te zizania ?” Ua parau atura oia ia ratou : “Na te tahi enemi te reira i rave.” Ua parau maira taua mau tavini ra e : “E ti’a anei ia oe ia haere matou e hutihuti ?” Ua na ö atura oia : “Eiaha, ’o te hutihuti atoa outou i te sitona, a vaere ai outou i te zizania. E vaiiho noa ia tupu apipiti noa ana e tae noa atu i te ootira sitona, ’e ia tae i te ootiraa ra, ei reira ïa vau e parau atu ai i te feia ooti : e matäna outou i te rave i te zizania a ruru ai, ia taninahia i te auahi. Area te sitona, e haaputu mai ïa i roto i tä’u fare vairaa sitona.” » E faaea te taioraa haapotohia i onei.

Ua tuu faahou atura oia i te tahi parabole ia ratou, na ö atura : « E au te Basileia o te ra’i i te hoe huero sinapi, o tei ravehia e te hoe taata ’e tei tanu hia e ana i roto i täna aua. O te iti roa ïa o te mau huero atoa nei ; e tupu rä, e rahi roa a’e ïa i te mau mäa tupu atoa, ’e e riro ei tumu raau, a tau mai ai te mau manu o te reva, ’e a ofaa ai i nia i te amaa. » Ua parau atura oia i te tahi atu parabole ia ratou, na ö atura : « E au te Basileia o te ra’i i te faahopue i ravehia e te hoe vahine ’e tei anoihia e ana i na faito faraoa ota e toru a’e, e hopue atura taua faraoa taatoa ra. » Taua mau parau atoa ra, ua na roto anae ïa i te parabole i te parauraahia e Iesu, ’e eita oia e parau ia ratou, maori ra na roto i te parabole. Ia ti’a te parau a te peropheta ra : E fämama ta’u vaha e parau i te parabole, e poro vau i te parau i vai mo’e noa ana mai te faatumuraahia o teie nei ao. Vaiiho ihora Iesu i tau tiaa rahi taata ra, haere atura i te fare. Ua haere maira tana mau pipi iana ra, ’e ua parau maira : « A tatara mai na i te parabole o te zizania i roto i te faaapu. » Ua pahono atura Iesu : « O teie ueue i te huero maitai ra, o te Tamaiti a te taata nei ïa. Te faaapu ra, o te ao nei ïa. Te huero maitai ra, o te mau tamarii ïa o te Basileia. Te zizania ra, o te mau tamarii ïa a te varua ino. Te enemi i ueue i taua zizania ra, oia te diabolo. Te ootira sitona ra, oia te hopea o teie nei ao. Te feia ooti ra, oia te mau melahi. Mai te zizania i ravehia ra ’e i taninahia i te auahi, oia atoa i te hopea o teie nei ao : e tono mai te Tamaiti a te taata nei i täna mau melahi ; e iriti ’ë ratou i te feia faaturori ’e te feia e rave i te ohipa parautia ore no roto mai i töna ra Basileia, a huti atu ai ia ratou i roto i te umu auahi, ei reira te oto ’e te ’au’auraa niho. Ei reira te feia parautia e anaana ai mai te mahana i roto i te Basileia o to matou Metua. E taria töna ra, ia faaroo oia ».

- Haapopou tatou i te Parau a te Atua.