DOMINIKA 15 i te tau noa

TAIORAA MATAMUA

« Te ua e faatupu te fenua »

A taio tatou i te puta a Isaia peropheta 55, 10-11

Teie te parau a te Fatu : « E mai te ua e topa nei, e mai te hiona no nia mai i te rai e aore e hoi faahou i reira, area ua faararirari i te repo, e ua tae i roto, e ua faatupu ihora, e ua horoa i te huero i te taata ueue, e te maâ i tei amu ra ; mai te reira te parau no roto mai i ta’u vaha, e ore ïa e hoi faufaa ore noa mai ia’u nei ; area e faatupu i ta’u i opua, e e manuia, no te mau mea ta’u i faaue atu. »

- O te Parau ïa a te Atua.

SALAMO 64, 10, 11, 12-13, 14

R/ Ua hio haere oe i te fenua, e ua faainu oe ia’na i te pape,
e te Fatu e, e haamaitai oe i tona huero.

Ua hio haere oe i te fenua, e ua faainu oe ia’na i te pape
ua faarahi oe i tona mau taoa ;
to te Atua mau anavai ïa î te pape,
te faatupu oe i te tari sitona.

Ua na reira oe ei faanahonahoraa ia’na :
te pipi nei oe i te mau aroteraa,
te haapapu nei oe i te vahi puupuu, te faarari nei oe ia’na i te papape,
e haamaitai oe i tona huero.

Te faahei nei oe i te matahiti i to mau maitai,
ua tae te hinu i nia iho i ta oe mau apoopoo ra,
ua rarirari te  aihere no te medebara,
ua faaati hia te aivi i te oâoâ.

Ua faaunauna hia te vahi matie i te nana puaa,
te faaahu hia te faa i te Sitona.
Ua pii te taata e te himene ratou i te oâoâ.

TAIORAA PITI

« Te fatimä’ü’ü nei hoi te mau mea atoa i poietehia e te Atua i te tiairaa i te heheuraa o te mau tamarii a te Atua »

A taio tatou i te epitore a Paulo peata i to Roma 8, 18-23

E au mau taeae e, te manao nei hoi au e : e ore te mau mamae o teie nei tau e au ia faito i te hanahana e heheuhia mai i roto ia tatou a muri atu. Te fatimä’ü’ü nei hoi te mau mea atoa i poietehia e te Atua i te tiairaa i te heheuraa mai o te hanahana o te mau tamarii a te Atua. Ua tuu-atoa-hia hoi taua mau mea poietehia ra i rato a’e i te faufaa ore ra, e ere rä no to ratou iho hinaaro. Nana rä te reira ohipa, na tei faahepo ia ratou. Te tiaturi nei ä rä taua mau mea ra. No te mea, te vai ra te mahana e faaorahia ai taua mau mea ra i te faaheporaa o te tahuti, ’e e tuhaa-atoa-hia ratou i te tiamaraa ’e te hanahana o te mau tamarii a te Atua. Ua ite hoi tatou : te uuru nei te mau mea atoa i poietehia ra i te mauiui fanau e tae roa a’enei i teie nei mahana. E ere rä o taua mea anae ra, o tatou atoa hoi i noaa ia tatou te mau oho matamua o te Varua, o tatou atoa tei uuru i roto ia tatou iho i te tätarira’a i te faatävairaa, oia hoi te faaoraraahia o to tatou tino.

- O te Parau ïa a te Atua.

ALLELUIA

Alleluia. Alleluia.
O te huero sitona te parau a te Atua ;
o te Kirito te ueueu huero ;
ia itea oia i te tahi taata e vai mai taua taata ra e a muri noa atu.
Alleluia.

EVANELIA

« Haere atura te ueue huero i rapaeau e ueue i te huero »

Evanelia o Iesu-Kirito a Mataio peata 13, 1-23 [Taioraa haapotohia : 1-9]

I taua mahana ra, haere atura Iesu i rapae i te fare, ’e ua parahi ihora i tahatai. E tiaa rahi taata tei putuputu maira iana ra. Haere atura oia i nia i te hoe poti parahi ai ; te ti’a noa maira te tiaa tahi taata i nia i te pae. E rave rahi te parau täna i parau parabole ia ratou, na ö atura : « Haere atura te ueue huero i rapaeau e ueue i te huero. A ueue noa ai oia, ua mairi ihora e tahi pae huero i te hiti aratia. Ma’ue maira te manu, titotito ihora e pau roa atura. Mairi ihora e tahi pae i te vahi ofafai aita re’a e repo, tupu ihora i reira ra, no te mea aita i mo’e re’a i raro i te repo. I te puairaa mai rä te mahana, oriorio ihora, ’e no te mea aore i a’ahia, pohe roa atura. Mairi ihora e tahi pae i roto i te raau taratara, tupu apipiti a’era ’e te raau taratara, ’e apiapî ihora. Mairi ihora e tahi pae i te vahi repo maitai, ’e hotu ihora ; noaa maira, i nia i te tahi tumu, taihoe hanere huero i te huero hoe ; ’e i nia i te tahi, taiono ahuru ; ’e i nia i te tahi, taitoru ahuru. E taria töna ra, ia faaroo oia. » E faaea te taioraa haapotohia i onei.

Ua fatata maira tana mau pipi iana ra, ’e ua na ö maira : « E aha oe e parau parabole ai ia ratou ? » Ua parau atura oia : « No te mea, ua horohia mai ia outou te ite i te mau parau ’aro o te Basileia o te ra’i, aita rä i horohia i taua mau taata ra. No te mea, e taoa täna ra, e horoahia atu ä täna e ia hau ; aita äna ra, e iriti-’ë-hia ïa täna ra. No reira vau e parau atu ai ia ratou na roto i te parabole : te hio nei hoi ratou ’e aita ratou e ite nei, te faaroo nei ’e aita ratou e haroaroa nei ’e aita i taa ia ratou. Ti’a atura ia ratou te parau tohu a Isaia peropheta, o tei na ö mai e : Faaroo noa ä outou, eita outou e haroaroa ; hio noa ä outou, eita outou e ite. Ua iita atura hoi te mafatu o teie nei nunaa ’e ua turi to ratou  taria ’e ua tapö ratou i to ratou mata, ’o te hio to ratou mata, ’o te faaroo to ratou taria, ’o te haroaroa to ratou mafatu, ’e o te faafariu mai ratou, ’e ’o te faaora atu vau ia ratou. E ao rä to outou : te ite nei hoi to outou mata, ’e te faaroo nei to outou taria. Oia mau, te faaite atu nei au ia outou : E rave rahi te peropheta ’e te taata parautia i hinaaro i te hio i te mau mea ta outou e hio nei, ’e aita ratou i hio ; ’e i te faaroo i te mau mea ta outou e faaroo nei, ’e aita ratou i faaroo. I teienei rä, a faaroo mai na i te parabole o te ueue huero. Ia faaroo te tahi taata i te parau o te Basileia ’e aore oia i maramarama, e haere mai ïa te varua ino ra, a rave ’ë atu ai i tei ueuehia i roto i töna mafatu. O te huru ïa i faahohoahia i te huero i mairi i te pae aratia ra. O tei mairi i te vahi ofafai ra, o te taata ïa faaroo i te parau ’e e faarii ma te oaoa, i reira ra. Aita rä te parau i a’ahia i roto i töna mafatu, e taata oia no te hoe noa tau : ia tupu mai te ati ’e te hamani ino no te parau, i reira ihora, ua maheaitu oia. O tei mairi i roto i te mau taratara ra, o te taata ïa e faaroo i te parau ; no te mau manaonao rä o teie nei ao ’e no te haavare hoi o te taoa, ua apiapi ihora te parau, ’e aita atura i hotu mai. O tei mairi i te vahi repo maitai, o te taata ïa e faaroo i te parau ’e ua maramarama atura, hotu maira täna, taihoe haner i te huero hoe, ’e aora rä taiono ahuru, ’e aore rä taitoru ahuru. »

- Haapopou tatou i te Parau a te Atua.