DOMINIKA 24 i te tau noa

TAIORAA MATAMUA

« I faahapa mai to taata tupu ia oe ra, e faaore atu ïa i taua hapa ra : e i reira ïa ta oe mau hara e faaore hia’i ia pure oe ra »

A taio tatou i te puta Ekalesetiatiko 27, 33 - 28, 1- 5a.c.- 9

E ino rahi apipiti to te riri e te tairoiro ra, e e tapea atu ä te taata rave hara i te reira. Oia o te hinaaro e nana iho e tahoo ra, e tae mai ïa te riri tahoo a te Fatu i nia iho iana, e e haamanao tamau mai â oia i tana ra mau hara. I faahapa mai to taata tupu ia oe ra, e faaore atu ïa i taua hapa ra : e i reira ïa ta oe mau hara e faaore hia’i ia pure oe ra. E tamau â te taata i tona riri i te taata, e te imi ra hoi oia i te ora iô te Atua ra ? O tei ore i aroha i te taata mai iana iho ra, te taû ra hoi oia e ia faaore hia mai tana iho ra mau hara ? E taata noa iho â ïa, e te tapea ra oia i te riri, e roaa râ ia vai te matararaa o tana ra mau hara ? A haamanao i to mau mea hopea, e a faaore atu i te enemiraa ; te vai ra hoi te tahutiraa e te pohe i te feia e ofati i tana ra mau ture. A haamanao na i te mataû i te Atua, e eiaha e riri atu i to oe na taata tupu. A haamanao i te faufaa a te Teitei roa ra, e a haamoe atu i te ite ore o to oe na taata tupu.

- O te Parau ïa a te Atua.

SALAMO 102, 1-2, 3-4, 9-10, 11-12

R/ E hamani maitai e e aroha te Fatu,
e ore e riri vave, ua î i te here.

E haamaitai i te Fatu, e ta’u varua e,
e to roto atoa ia’u nei, e haamaitai ïa i tona ioa moâ.
E haamaitai i te Fatu, e ta’u varua e,
e eiaha te hoè maitai ana i horoa maira ia aramoina ia oe na.

O tei faaore i ta oe atoa na mau hapa,
e tei faaora i ta oe atoa na mau mai ;
o tei faaora ia oe i te pohe,
o tei haamaha i to hiaai i te taoa i to oe na oraraa.

E ore oia e vaiiho tamau i tona riri,
e ore e tapea e a muri noa’tu i te manao tairoiro.
Aore oia e tahoo mai ia au i ta tatou mau hara
e aore hoi e faautua mai ia tatou e ia faito i ta tatou mau ino.

Mai te teitei raa hoi o te mau rai i nia i te fenua nei,
mai te reira te puai o tona here i te feia e mataû iana ;
mai te hitia o te râ i atea i te tooa o te râ ra,
mai te reira tona faaatearaa i ta tatou mau hara ia tatou nei.

TAIORAA PITI

« Te ora nei tatou, ia pohe tatou, no te Fatu »

A taio tatou i te epitore a Paulo peata i to Roma 14, 7-9

E au mau taeae e, aore roa hoi te hoe o tatou e ora nei nona iho, ’e aore roa hoi e taata e pohe nona iho. Te ora nei tatou, no te Fatu ïa tatou e ora ai ; ia pohe tatou, no te Fatu ïa tatou e pohe ai. Ia ora tatou, ’e ia pohe tatou, no te Fatu ä tatou. Teie hoi te tumu i pohe ai te Kirito ’e i tiafaahou ai oia : ia riro oia ei Fatu no tei pohe ’e no tei ora.

- O te Parau ïa a te Atua.

ALLELUIA

Alleluia. Alleluia.
E faaueraa api tä’u e faaue nei ia outou,   cf. Ioa 13, 34
- te na ô maira te Fatu -  :
« A here outou ia outou iho,
mai ia’u i here atu ia outou na. »
Alleluia.

EVANELIA

« Te parau atu nei au ia oe : eiaha ia taihitu, ia hitu ahuru rä te taihitu »

Evanelia o Iesu-Kirito a Mataio peata 18, 21-35

I taua anotau ra, haere maira Petero iana ra, na ö maira : « E te Fatu, ia taihia o ta’u taeae hamani-ino-raa mai ia’u, ’e tä’u faaoreraa atu i täna hara ? Ia taihitu anei ? » Ua na ö atura Iesu iana : « Te parau atu nei au ia oe : eiaha ia taihitu, ia hitu ahuru rä te taihitu. E au te Basileia o te ra’i i te hoe arii o tei hinaaro i te faaafaro i te faufaa ’e töna ra mau tavini. Tei te haamataraa oia i te faaafaro, arataihia maira te hoe aitarahu hoe ahuru tauatini taleni täna tarahu. ’E no te mea aita äna e moni ei faahoi mai, faaue atura te fatu ia hoohia oia ’e täna vahine ’e täna mau tamarii ’e täna mau taoa atoa ra, ei haapeeraa i täna tarahu. Tuturi ihora taua tavini ra i raro, ’e ua tahopu maira i mua i töna fatu, na ö maira : “E ta’u fatu, eiaha na oe e rü ia’u, ’e na’u e faahoi atu ia oe, i te taatoaraa o tä’u tarahu.” Aroha atura töna fatu iana, ’e ua tuu atura iana, mai te faaore atoa i täna tarahu. ’E, tae a’era taua tavini ra i rapae, ua ite atura oia i te hoe taetaeae tavini nona ra, hoe ahuru denari täna tarahu iana. Haru atura oia iana, uumi atura i töna arapoa, na ö atura : “A faahoi mai i te moni taatoa ta oe tarahu mai.” Tahopu ihora töna taetaeae tavini i raro i töna pae avae, na ö maira : “Eiaha na oe e rü ia’u, ’e e faahoi au ia oe i ta oe moni.” Aita rä te tahi i hinaaro, haere atura oia, ’e u ahuri atura i töna taetaeae tavini i roto i te tapearaa e pee noa atura täna tarahu. ’E, ite a’era to raua mau taetaeae tavini i taua ohipa ra, oto ihora ratou, ’e ua haere maira e faaite i to ratou fatu i te mau mea atoa i tupu ra. Ua pii atura te fatu i taua tavini ra,’e ua parau atura iana : “E teie nei tavini ino e, ua faaore au i ta oe atoa ra tarahu i te mea e ua taparu mai oe ia’u. E ere anei i te mea ti’a ia aroha atoa oe i to oe taetaeae, mai ia’u i aroha atu ia oe ?” Riri a’era töna fatu iana, tuu atura iana i te feia haamauiui ra e ia pee roa atu te moni i tarahuhia mai e ana. E na reira atoa ta’u Metua i te ra’i ra ia outou, ia ore outou tataitahi e faaore, ma te aau tae, i te hara a töna taeae. »

- Haapopou tatou i te Parau a te Atua.