DOMINIKA 28 i te tau noa

TAIORAA MATAMUA

« E e faanahonaho te Fatu i te hoe amuraa maâ ; e e horoi i te roimata no te mau mata’toa ra »

A taio tatou i te puta a Isaia peropheta 25, 6-10a

E e faanahonaho te Fatu o te mau nuu i te mau nunaa i nia i teie moua, i te hoe amuraa maâ o te mau mea poria, i te inuraa uaina maitai, i te mau mea poria e te momona, i te uaina i ore te ota. I nia i teienei moua, e haamotu ai oia i te fifi i taamu hia’i te mau nunaa’toa, e te vehi i vehia’i te mau fenua’toa. E haamou roa oia i te pohe e a muri noa’tu, e e horoi te Fatu te Atua i te roimata no te mau mata’toa ra, e e faaore atoa oia i te faaino o tona nunaa no nia i te fenua’toa ra, no te mea o te Fatu tei parau. I te reira mahana, e parau ai tona nunaa e : « Inaha, teie to tatou Atua, ua tiai tatou iana, e e faaora oia ia tatou ; teie te Fatu, ua tiai maoro noa tatou iana, e oua tatou, e e oâoâ tatou i te ora nona ra ! » No te mea, e faaea te rima o te Fatu i nia i teie moua.

- O te Parau ïa a te Atua.

SALAMO 22 (2), 1-2ab, 2c-3, 4, 5, 6-7

R/ E ia parahi au i roto i te fara o te Fatu,
e maoro noa’tu te mahana.

O te Fatu to’u tiai,
e e ore roa vau e ere.
I roto i te mau vahi matie api
oia i aua mai ai ia’u.

Ua aratai mai ia’u i te pape e maha ai to’u rohirohi.
Ua faaapi faahou mai oia i to’u varua.
Ua aratai oia ia’u na te êâ o te parautia,
no te here i tona ra ioa.

E ia hahaere noa vau na ropu i te maru pohe ra,
e ore â vau e mataû i te ino ;
tei pihaiiho hoi ia’u to raau e te turutootoo,
ei haamahanahana mai ia’u.

Ua faanahonaho oe i te tahi amuraa maa ia’u,
i mua i te aro o to’u mau enemi ;
ua faanoanoa mai oe i to’u nei upoo i te hoe faatahinuraa,
manii noa aera ta’u aua i rapae.

Oia mau, e haati mai te karatia e te oiâoâ
i te mau mahana’toa o to’u nei oraraa ;
e ia parahi au i roto i te fare o te Fatu,
e maoro noa’tu te mahana.

TAIORAA PITI

« E ti’a ia’u te mau mea atoa i te mana nona no tei faaetaeta mai ia’u nei »

A taio tatou i te epitore a Paulo peata i to Philipi 4, 12-14.19-20

E au mau taeae e, e ti’a ia’u ia ora i roto i te veve, e ti’a ia’u ia ora i roto i te fanao. Ua haamätauhia vau i te ora ma te paia ’e ma te poia, ma te navai, ’e ma te navai ore. E ti’a ia’u te mau mea atoa i te mana nona, no tei faaetaeta mai ia’u nei. E ohipa ti’a rä ta outou i rave i te tururaa mai ia’u i roto i tö’u nei ati. ’E na ta’u Atua e horoa rahi mai i te mau mea atoa e hinaarohia e outou, mai te au i te rahi o tana mau taoa, na roto ia Iesu-Kirito ra. Ei hanahana to te Atua, to tatou Metua, e a tau a hiti noa atu.

- O te Parau ïa a te Atua.

ALLELUIA

Alleluia. Alleluia.
Ia ti’a i te Metua o to tatou Fatu o Iesu-Kirito           cf. Eph 1, 17-18
ia maramarama te mata o to outou mafatu,
ia ite outou i te tiaturi i noaa mai ia outou no täna nominoraa.
Alleluia.

EVANELIA

« A parau atu i te feia atoa e itea ia outou, e haere mai i te oroa faaipoiporaa »

Evanelia o Iesu-Kirito a Mataio peata 22, 1-14 [T. haapotohia : 1-10]

I taua anotau ra, ua parau faahou atura Iesu ia te mau tahua rarahi e i te feia paari, i te parabole, na ö atura : « E au te Basileia o te ra’i i te hoe arii o tei faatupu i te oroa faaipoiporaa no tana tamaiti. Ua tono atura oia i tana au tavini e tii i te feia i titau-manihini-hia i taua oroara, ’e aita ratou i hinaaro e haere mai. Ua tono faahou atura oia i te tahi ä mau tavini, na ö atura : “E parau outou i te feia i titau-manihini-hia, inaha ua nahonaho tä’ u amuraa, ua tupaihia tä’u mau puaatoro ’e tä’u mau puaa faamu. Ua nahonaho te mau mea atoa. A haere mai i te oroa faaipoiporaa.” Aita rä ratou i haapao mai, haere ’ë atura, te tahi i täna faaapu, te tahi i töna hooraa. Haru maira te tahi pae i töna mau tavini, hamani ino maira, ’e taparahi pohe roa atura. Riri a’era te arii, tono atura i töna nuu tama’i, taparahi pohe roa atura i taua mau taparahi taata ra, ’e ua tanina atura i to ratou oire i te auahi. Ua parau atura oia i tana mau tavini : “Ua nahonaho te oroa faaipoiporaa, area te feia i titau-manihini-hia, aore ïa i au. No reira, a haere outou i te mau maaraa ea, a parau atu i te feia atoa e itea ia outou, e haere mai i te oroa faaipoiporaa.” Haere atura taua mau tavini ra na te mau ea, ’e ua ope maira i te taata atoa i itea ia ratou, tei maitai ’e tei ino, ï roa a’era te fare oroa i te manihini. » E faaea te taioraa haapotohia i onei.

’E, tomo maira taua arii ra i roto i te fare e hio i te mau manihini, ite ihora oia i te hoe taata o tei ore i ahu i te ahu faaipoiporaa. Ua parau atura taua arii iana ra : “E hoa, e aha oe i tomo mai i ö nei, ’e aita to oe e ahu faaipoiporaa ?” Mamu noa ihora taua taata ra. Ua parau atura te arii i te mau tavini : “A ruuruu i na avae ’e i na rimanona ra, a hopara atu ai iana i te poiri i vaho ra ; ei reira te oto ’e te ’au’auraa niho.” E rave rahi hoi tei parauhia, e iti rä tei maitihia. »

- Haapopou tatou i te Parau a te Atua.