DOMINIKA 32 i te tau noa

TAIORAA MATAMUA

« E e noaa ïa ia ratou te Paari i tei imi atu iana ra »

A taio tatou i te puta a te Paari 6, 13-17

E hinuhinu te i te Paari, e e ore roa ïa e mârau, e itea ohie hia ïa e te feia e hinaaro atu iana ra, e e noaa ïa ia ratou i tei imi atu iana ra. Te na mua nei oia i te feia e hinaaro atu iana ra, o oia na hoi te faaite mai iana iho ia ratou ra. O tei imi atu iana, i te araraa i te poipoi roa ra, e ore ïa e rohirohi : e ite hoi oia iana i te parahiraa mai i tona ra uputa fare. E teie nei, o te manao atu iana ra, o te ite mau ïa, e o te ara i te reira, e ora roaa oioi ïa tona. Te hahaere ra hoi oia ma te imi i tei au mai iana ra, e e faaite ma te oâoâ oia iana iho ia ratou, i nia i te mau êâ ra, e e farerei atu ia ratou ma te porovida atoa ra.

- O te Parau ïa a te Atua.

SALAMO 62, 2, 3-4, 5-6, 7-8

R/ Ua poia tau varua ia oe,
e te Fatu e, e tau Atua e !

E te Atua e, e tau Atua e, te imi nei au ia oe,
ua poiha tau varua ia oe.
Te oriorio nei to’u tino no oe,
mai te fenua marô e te poiha e te pape ore.

Te hinaaro nei au e hio ia oe i te vahi moà ra,
e ite i to mana e i to hanahana.
Mea au ae to aroha i te ora,
e umere to’u utu ia oe.

Te hinaaro nei au e haamaitai ia oe i to’u oraraa taatoa,
e faateitei au i tau rima i ta oe na ioa.
e maha tau varua ia oe mai tei te toahua e te mei.
E arue atu tau vaha ia oe ma te oaoa.

Ia haamanao vau ia oe, i nia iho i to’u roi,
te feruri noa ïa vau ia oe na roto i te mau araraa.
O oe hoi tei tauturu mai ra ia’u,
e teienei te oâoâ nei au i to maru pererau.

TAIORAA PITI

« Oia atoa te feia e taoto ra i roto ia Iesu, na te Atua ïa e faahoi mai ia ratou »

A taio tatou i te epitore matamua a Paulo peata i to Tesalonia 4, 13-18 (T. haapotohia : 13-14)

E au mau taeae e, eita vau e hinaaro ia vai poiri noa outou i te parau no te feia e taoto ra, ia ore to outou manao ia rumaruma mai to te feia aore o ratou e tiaturiraa. Ia faaroo hoi tatou e : i pohe na o Iesu ’e ua tiafaahou mai, e faaroo atoa ïa tatou e, oia atoa te feia e taoto ra i roto ia Iesu ; na te Atua ïa e faahoi mai ia ratou ’e o Iesu atoa ra. E faaea te taioraa haapotohia i onei.

Teie tä’u e parau atu ia outou, mai te au i te haapiiraa a te Fatu ra : o tatou, te feia ora i toe noa e tae noa atu i te haereraa mai o te Fatu, eita ïa tatou e na mua i te feia e taoto nei. No te mea, ia faaue te reo o te ariimelahi, ’e ia oto te pü a te Atua, e pou mai te Fatu iho, mai te ra’i mai ; ei reira te feia i pohe i roto i te Kirito e tiafaahou ai na mua. I muri mai, o tatou ïa, te feia ora i toe ra, te rave-atoa-hia, ’e o ratou atoa i nia i te ata, ia farerei atu i te Fatu i roto i te reva nei, ’e mai reira mai, ei te Fatu noa ïa tatou e a muri noa atu. ’E tenä na, a tamahanahana outou te tahi i te tahi i teie nei mau parau.

- O te Parau ïa a te Atua.

ALLELUIA

Alleluia. Alleluia.
E ara maoti outou,                    cf. Mat 24, 42a.44
ei te hora manao-ore-hia
e outou te Tamaiti a te taata e tae mai ai.
Alleluia.

EVANELIA

« Teie mai nei te tane faaipoipo api nei ; e haere outou e farerei iana »

Evanelia o Iesu-Kirito a Mataio peata 25, 1-13

I taua anotau ra, ua parau atura Iesu i teie parabole i t?na mau pipi : « Ei reira te Basileia o te ra’i e au ai i na tamahine tino ahuru. Rave ihora ratou i ta ratou lamepa, haere atura e farerei i te tane faaipoipo api. I roto ia ratou ra, toopae, e tamahine manao ore ïa, e toopae, e tamahine manao paari ïa. A rave mai ai na tamahine manao ore ra i ta ratou lamepa, aita ratou i rave atoa mai i te hinu. Na tamahine paari ra, ua rave atoa mai ratou i te hinu i roto i te farii. ’E, te maoro ra taua tane faaipoipo api ra, tiaruhe paatoa ihora ratou, ’e mairi ihora te taoto. ’E, tu’i a’era te pö, faaroohia atura te pii : “Teie mai nei te tane faaipoipo api nei ; e haere outou e farerei iana.” Ti’a a’era taua mau tamahine atoa ra i nia, ’e ua faaineine ihora i ta ratou lamepa. Ua parau atura te mau tamahine manao ore i tei paari ra : “Hö mai na i te tahi ma’a hinu no ö mai i ta outou, te pohe hei hoi ta matou mau lamepa.” Ua pahono maira rä te mau tamahine paari : “A haere atu i te feia hoo ra, hoo mai ai i ta outou iho, ’o te ore hoi ’o te ravai ta matou hinu na tatou atoa.” ’E ia haere atura taua mau tamahine manao ore ra e hoo mai i te hinu, tae maira taua tane faaipoipo api ra ; e te mau tamahine i ineine ra, tomo anae atura ïa ’e oia atoa i roto i te fare oaoa, ’e ua opanihia atura te uputa. ’E, muri a’era, tae atoa maira te tahi pae tamahine, na ö maira : “E te Fatu, e te Fatu, a iriti mai na i te opani.” Ua pahono atura ra oia : “Oia mau, te faaite atu nei au ia outou, aita vau i ite ia outou.” E ara maoti outou, no te mea aore outou i ite i te mahana ’e te hora. »

- Haapopou tatou i te Parau a te Atua.