DOMINIKA 31 i te tau noa

TAIORAA MATAMUA

« Ua faarue râ outou i te èâ, e ua faaturori outou e raverahi i roto i te ture »

A taio tatou i te puta a Malakia peropheta 1, 14b - 2, 1-2b.8-10

E Arii rahi au, te parau maira te Fatu o te mau nuu, e ua mataü hia to’u nei ioa i ropu i te mau etene. E teienei te ia outou teienei poroiraa, e te mau tahua e. Ia ore outou ia hinaaro e faaroo, e ia ore ia hinaaro e haapao, ma te mafatu, ia tuu outou i te hanahana i to’u nei ioa, te na reira maira te Fatu o te mau nuu ; e tuu au i te veve i topu ia outou, e katara vau i to outou haamaitai. Ua faarue râ outou i te èâ, e ua faaturori outou i te taata e raverahi i roto i te ture ; ua ofati outou i te faufaa a Levi, te parau amira te Fatu o te mau nuu. No reira ua tuu au ia outou ia vahavaha hia e ia faahaehaa i ropu i te mau nunaa’toa, o outou tei ore i haapao i to’u mau èâ, o outou tei hio i te huru o te taata i roto i te ture. E ere anei e hoe to tatou metua tane atoa nei ? E ere anei e hoe Atua tei poiete ia tatou ? E aha ra te taata atoa, o tatou nei i vahavaha’i i tona taeae, ma te ofati i te faufaa o to tatou mau metua ?

- O te Parau ïa a te Atua.

SALAMO 130, 1, 2abcd, 2ef

R/ A tapea mai ta’u varua i roto i te hau
i pihai iho ia oe, e te Fatu e.

E te Fatu e, aore ta’u mafatu i faateitei iana iho,
e aore hoi ta’u pue mata i tiatonu tia’atu i nia
aore hoi, au i haere na te èà o te mau toroa teitei
e te mau ohipa maere i hau ae ia’u nei.

Aita, te tapea nei au i ta’u varua ma te hau,
e ma te parau ore ra,
mai te aiu i faatopa te u ra,
mai te reira’toa o to’u varua i roto ia’u.

Te tiaturi nei à Iseraela i te Fatu,
mai teie atu nei e a muri noa’tu.

TAIORAA PITI

« Ua ti’a roa ia’u ia püpü atu ia outou, eiaha i te Evanelia anae o te Atua, i tö’u atoa rä ora  »

A taio tatou i te epitore matamua a Paulo peata i to Tesalonia 2, 7b-9.13

E au mau taeae e, i marü noa na rä vau i rotopu ia outou, mai te hoe metua vahine e poihere ra i täna mau tamarii. ’E no te rahi o tö’u here ia outou, ua ti’a roa ia’u ia püpü atu ia outou, eiaha i te Evanelia anae o te Atua, i tö’u atoa rä ora. Aita i mo’e ia outou, e te mau taeae e, tä’u ohipa ’e tö’u rohirohi : ua parau vau ia outou i te Evanelia o te Atua ma te rave atoa i te ohipa i te pö ’e te ao, ia ore o outou ra ia teiaha ia’u. I tö’u nau pae, teie te tumu e haamaitai-tuutuu-ore-noa ai au i te Atua : ia outou i faaroo i te parau a te Atua tä’u i faatae atu ia outou na, aita ïa outou i faarii i taua parau ra, mai te hoe parau taata, mai te parau rä a te Atua, e oia mau ä hoi. No te mea, te ohipa atoa nei te Atua i roto ia outou i tei faaroo ra.

- O te Parau ïa a te Atua.

ALLELUIA

Alleluia. Alleluia.
Hoe roa hoi o outou Metua,                cf. Mat 23, 9b.10b
tei te ra’i ra.
Hoe roa hoi a outou haapii, o te Kirito ïa.
Alleluia.

EVANELIA

« E parau hoi ratou, eita rä e rave »

Evanelia o Iesu-Kirito a Mataio peata 23, 1-12

I taua anotau ra, o to Iesu ïa parauraa atu i te tiaa rahi taata ’e i tana mau pipi atoa hoi, na ö atura : « Ua parahi te mau papai parau ’e te mau pharisea i nia i te parahiraa o Mose. No reira, te mau mea atoa ta ratou e parau mai, e rave ïa outou ’e e haapao ; eiaha rä outou e pee ia ratou, e parau hoi ratou, eita rä e rave. E taamu hoi ratou i te hopoia teimaha, a tuu atu ai i nia i te tapono o te taata, area ratou, eita ïa e fa’ati’a’ia noa atu i taua mau hopoia ra. Ta ratou atoa e rave ra, e rave ïa ratou ia hiohia e te taata. E faaaano ratou i ta ratou phulakateri ’e e faaroa i to ratou hiti ahu. E mea au na ratou te parahiraa matamua i roto i te mau amuraa mäa, ’e i roto hoi i te mau sunago. E mea au na ratou ia arohahia ratou i te mau aroä ’e ia parauhia ratou e te taata e, “e te orometua” . Area outou, eiaha ïa e titau atu ia parauhia mai outou e , “orometua” ; hoe roa hoi a outou orometua ’e e taeae anae outou atoa na. Eiaha atoa outou e faametua i te hoe taata o teie nei ao, hoe roa hoi o outou Metua, tei te ra’i ra. Eiaha atoa outou e titau ia parauhia outou i te “haapii”, hoe roa hoi a outou haapii, o te Kirito ïa. O tei hau rä i roto ia outou, ia riro ïa ei tavini no outou. O te faateitei iana iho, e faahaehaahia ïa, ’e o te faahaehaa iana iho, e faateiteihia ïa. »

- Haapopou tatou i te Parau a te Atua.