25 no Eperera - Mareko peata

25 no EPERERA

MAREKO PEATA
e papai Evanelia

Oro’a

TAIORAA MATAMUA

« Te aroha atu nei ta’u tamaiti o Mareko ia outou »

A taio tatou i te epitore matamua a Petero peata 5, 5b-14

E au mau here e, ’e outou atoa na hoi, e ahu na i te haehaa i roto i to outou oraraa amui. Oia mau, E patoi hoi te Atua i te feia teoteo, e horoa mai rä oia i täna karatia i te feia haehaa. No reira, e faahaehaa ia outou iho i raro a’e i te rima mana o te Atua, ia faateitei mai oia ia outou, i te tau i faataahia e ana ra. E huri outou i to outou mau manaonao atoa i nia iana, te aupuru mai nei hoi oia ia outou. E haapae i te ’ava, ’e e ara, te hahaere nei hoi to outou enemi, te diabolo, mai te liona uuru ra, i te imiraa i te taata e pau iana ra. E patoi atu iana ma te faaroo turori ore, ua ite hoi outou e, ua roohia-atoa-hia to outou mau taeae e ati noa a’e te ao nei e taua mau pohe nei. O te Atua, no ? mai iana ra te mau karatia atoa, o tei nomino mai ia outou i roto ia Iesu-Kirito, ia tuhaa-atoa-hia outou i t?na hanahana etereno, nana atoa ïa e haamaitai roa ia outou, ia maoro iti a’e to outou mau pohe, ’e è faaetaeta mai oia ia outou, e faaitoito mai, ’e e faariro mai ei feia aueue ore. Ei iana ra te hau e a tau a hiti noa atu. I papai atu na vau i teie nei mau parau rii, ma te tauturuhia e Siluano, o te hoe ïa taeae e au ia tiaturihia, i t?’u manao, no te a’o atu ia outou, ’e no te haapapu ia outou e, tei roto outou i te karatia mau a te Atua, no reira, e parahi outou i roto i taua karatia nei. Te aroha atu nei te amuiraa o te feia maitihia i Babulonia nei ia outou, oia atoa ta’u tamaiti o Mareko. E aroha outou te tahi i te tahi i te ho’i taeae. Ei hau to outou atoa e parahi na i roto i te Kirito.

- O te Parau ïa a te Atua.

SALAMO 88 (89.), 2-3, 6-7, 16-17

R/ E himene â vau i to oe na here, e te Fatu e,
e a muri noa’tu !

E aore râ : Alleluia !

E himene â vau i to oe na here, e te Fatu e, e a muri noa’tu,
e na ta’u vaha e faaite i te parau mau na oe i tera ui, i tera ui.
Ua parau hoi au e : e tia to aroha i te vai mure ore raa,
tei te mau rai ra to parau mau i te haamau raa hia.

Te haamaitai te mau rai i ta oe na ravea mana, e te Fatu e,
e to parau mau ra i te amuiraa o te feia moâ.
O vai hoi to te mau rai ra e au i te Fatu,
o vai te au i te Atua i rotopu i te mau tamarii a te mau atua ra ?

E ao to te nunaa tei ite i te oâoâ ra,
e hahaere â ratou, e te Fatu e, i te maramarama o to mata na ;
e oâoâ ra ratou i to io’a e rui noa’e te mahana,
e ua faateitei hia ratou i te parau tia na oe na.

ALLELUIA

Alleluia. Alleluia.
Te a’o nei râ matou i te hoe kirito i faatataurohia, cf. 1 Kor 1, 23a.24b
o te mana o te Atua ’e te paari o te Atua.
Alleluia.

EVANELIA

« E poro i te Evanelia i te mau taata atoa »

Evanelia o Iesu-Kirito a Mareko peata 16, 15-20

I teie tau ra, parau atura Iesu tiafaahou i na Apotoro ho’e ahuru ma ho’e : « E haere outou e ati noa a’e te ao nei e poro i te Evanelia i te mau taata atoa. O te faaroo ’e ua papetitohia, e ora ïa, area o te ore e faaroo, e faahapahia ïa. Teie te mau tapao e na muri i te feia e faaroo : e tiavaru ratou i te demoni i t?’u nei i’oa, e parau ratou i te reo api ; e rave noa ratou i te ophi i roto i to ratou rima ; ia inu ratou i te inu taero e pohe ai ra, e ore ratou e ino a’e ; e tuu ratou i te rima i nia i te feia ma’i, a ora ai ratou. » ’E, oti a’era taua paraparauraa nana ra, ua ravehia maira te Fatu i nia i te ra’i, ’e ua parahi atura i te rima atau o te Atua. Haere atura ratou e a’o haere na te mau vahi atoa. Te ohipa ra te Fatu ’e o ratou atoa, ’e te faaite ra i te ti’a o te parau na roto i te mau tapao e tupu i te mau vahi atoa e afaihia ai te Parau.

- Haapopou tatou i te Parau a te Atua.