25 no Tenuare - Te Fariuraa o Pauro Peata

25 no TENUARE

TE FARIURAA O PAURO PEATA
e apotoro

Oro’a

TAIORAA MATAMUA

E tia ia maite hoe taioraa i roto i na taioraa e maha i raro nei :

1. « A ti’a i nia, ia papetitohia oe ’e ia tamähia oe i ta oe mau hara i te ta’uraa i te i’oa o Iesu. »

A taio tatou i te Ohipa a te mau Apotoro 22, 3-16

I taua mau mahana ra, ua parau atura oia Paulo ia i te hui raatira : « E Ati-Iuda vau, ua fanauhia vau i Tareso i Kilihia ra ; ua paari rä vau i te oire nei ; ’e i ö nei atoa hoi, i te pae avae o Gamaliela, vau i haapiihia ai i te haapao maite i te ture a to tatou hui metua. I itoito roa na vau te tavini i te Atua, mai ia outou atoa na i teie nei mahana. Ua hamani ino vau i te mau taata o teie ea e tae roa atu i te pohe : ua ruuruu vau i te tane ’e te vahine,’e ua huri au ia ratou i roto i te tapearaa. E ti’a i te tahu ‘a rahi ’e i te feia paari ia faaite i te reira. Ia’u hoi i haere i Damaseko e ruuruu i to reira mau taata, no te aratai mai ia ratou i Ierusalema nei, ia faautuahia ratou, na te tahu’a rahi ’e te feia paari i horoa mai ia’u i te rata na to tatou mau taeae i Damaseko. Te haere noa atu ra vau i taua tere ra, ua huru avatea ïa’e te fatata maira Damaseko, inaha, aore i mähia, ua ati ihora vau i te hoe maramarama rahi no te ra’i mai. Mairi ihora vau i raro i te repo, ’e ua faaroo atura vau i te hoe reo i te na öraa mai e : « E Saulo, e Saulo, e aha oe e hamani ino mai ai ia’u ? » Ua ui atura vau : « E te Fatu, o vai oe na ? Ua pahono maira taua reo ra : o vau o Iesu i Nazareta ta oe e hamani ino mai nei. » Te mau taata i amui mai ia’u, ua ite ïa i te maramarama, aita rä ratou i faaroo i te reo i parau mai ia’u ra. Ua ui atura vau : « E te Fatu, e aha vau ? » Ua pahono maira te Fatu : « a ti’a i nia, ’e a haere i Damaseko, ei reira e faaitehia ai ia oe te mau mea atoa ta oe e rave. » ’E, aita a’era i ti’a ia’u ia ite, no te anaana o taua maramarama ra, ua aratai-rima-hia atura vau e tae roa atura i Damaseko. Tei reira te hoe taata o Anania te i’oa, e taata paieti i te haapaoraa i te ture, e roo maitai töna i te mau Ati-Iuda atoa e parahi ra i Damaseko. Ua haere maira oia,’e ua ti’a maira i pihai iho ia’u, na ö maira : « E ta’u taeae, e Saulo e, ia ite faahou to oe mata ! » ’E, i reira ihora, ite atura vau iana. Ua parau maira oia ia’u : « Ua maiti te Atua o to tatou hui metua ia oe, ia ite oe i töna hinaaro, ’e ia hio to oe mata i te Taata-parautia ra, ’e ia faaroo oe i ta parau no roto mai i töna iho vaha.              E riro hoi oe ei ite nona i mua i te taata atoa, a faaite ai i teie ohipa ta oe i hio na ’e ta oe i faaroo na. E aha oe e feaa ai ? A ti’a i nia, ia papetitohia oe ’e ia tamähia oe i ta oe mau hara i te ta’uraa i te i’oa o te Fatu. »

- O te Parau ïa a te Atua.

E aore râ :

2. « Ei reira oe e faaitehia ai, e aha ta oe e rave »

A taio tatou i te Ohipa a te mau Apotoro 9, 1-22

Area Saulo, aita atu ä täna e opuaraa, maori ra e haamata’u ’e e taparahi i te mau pipi a te Fatu. Haere atura oia e farerei i te tahu’a rahi, ’e ua ani atura iana i te rata no te mau sunago i Damaseko, ia aratai mai oia i Ierusalema, ma te fifi auri, i te mau tane ’e te mau vahine i mahere i taua ea ra, ia roaa noa atu iana i Damaseko. ’E, te haere noa atu ra oia i töna tere, ’e ua fatata maira Damaseko iana ra, inaha, aore i mähia, ua ’ati ihora oia i te hoe maramarama rahi no nia mai i te ra’i. Mairi ihora oia i raro i te repo, ’e ua faaroo atura i te hoe reo i te na öraa mai e :   « E Saulo ! e Saulo ! e aha oe e hamani-ino-mai ai ia’u ? » Ua ui atura oia : « E te Fatu, o vai oe ? Ua parau maira te Fatu : o vau o Iesu, ta oe e hamani ino mai nei. A ti’a i nia ’e a tomo atu i roto i te oire, ei reira oe e faaitehia ai, e aha ta oe e rave. » Te mau taata i haere ’e oia atoa ra, ua ti’a ihora ïa ma te muhu ore. Ua faaroo tatou i te reo, aita rä e taata i itea. Ua ti’a a’era Saulo i nia, teie rä, ’ara’ara noa ai tana mata, aita hoe a’e mea e itehia ra e ana. Ua aratai-rima-hia oia e roto roa i Damaseko. Ua faaea noa ihora oia i reira ma te ite ore e a toru mahana ; ’e aita atoa oia i amu i te mäa ’e i inu i te pape. Tei Damaseko te hoe pipi, o Anania te i’oa. Ua pii maira te Fatu iana, na roto i te hoe orama, na ö maira : « E Anania ! » Ua pahono atura oia : « E te Fatu, teie au. » Ua parau faahou maira te Fatu : « A ti’a i nia, a haere i te aroä i parauhia ra, o Titiaifaro, ’e, ia tae oe i roto i te fare o Iuda, e ani oe i te hoe taata, o Saulo no Tareso te i’oa. Inaha, te pure ra oia, ’e ua ite oia i te hoe taata, o Anania te i’oa, i te tomoraa mai ’e i te tuuraa mai i tana rima i nia iho iana, ia ite faahou töna mata. » Ua pahono atura Anania : « E te Fatu, i faaroo a’enei au i te parau a na taata e rave rahi no nia i taua taata ra ’e töna hamani ino i tö mau taata mo’a i Ierusalema. ’E ua haamana-atoa-hia oia e te mau tahu’a rarahi, ia haere mai oia i ö nei e tapea i te fifi i te mau taata atoa e tiaoro i to oe na i’oa. » Ua parau maira te Fatu iana : « A haere, e farii maitihia hoi oia na’u i mua i te aro o te mau etene ra, o te mau arii ’e o te mau tamarii a Iseraela. Na’u hoi e faaite iana i te rahi o te mau mauiui täna e faaoroma’i no tö’u nei i’oa. » Haere atura Anania, ’e ua tomo atura i roto i taua fare ra, ’e ua tuu atura i tana rima i nia iho ia Saulo, na ö atura : « E ta’u taeae, e Saulo e, ua tonohia mai au e te Fatu, e Iesu, o tei fä mai ia oe i nia i te aratia ta oe i haere mai ra, ia ite faahou to oe mata ’e ia faaïhia oe i te Vatua-Maitai. » I reira ihora, ua mairi ihora te iri no nia i töna mata mai te poa i’a te huru, ’e ite faahou atura tana mata. Ti’a a’era oia, ’e papetitohia ihora. ’E ua tamäa ihora oia,’e itoito atura. Ua parahi ihora Saulo i te tahi mau mahana i Damaseko ’e te mau pipi atoa ra. ’E ua haamata ihora oia i te a’o haere i roto i te mau sunago ma te parau e : o Iesu te Tamaiti a te Atua. Ua maere ihora te feia atoa e faaroo mai ra iana ra, na ö a’era : « E ere anei teie i te taata i ’aro na i te taata e tiaoro ra i te i’oa o Iesu i Ierusalema ? E ere anei ua tae mai nei oia i ö nei no tapea i taua mau taata ra i te fifi, a aratai atu ai ia ratou i te tahu’a rahi ra ? » Te itoito noa atu ra rä Paulo, ’e ua haamamu atura i te Atu-Iuda e parahi ra i Damaseko i täna mau tatararaa, o tei faaite-papu e, o Iesu mau ä te Mesia.

- O te Parau ïa a te Atua.

SALAMO 116, 1, 2

R/ E haere outou e ati noa a’e te ao nei.
E poro i te Evanelia !

E aore râ : Alleluia !

A haamaitai i te Fatu, e te mau nunaa atoa e !
A faateitei iana, e te mau taata’toa e !

E mea puai tona aroha i nia ia tatou nei,
e tana ra parau-mau e tia i te vairaa e a muri noa’tu.

ALLELUIA

Alleluia. Alleluia.
O vau rä tei maiti ia outou ’e tei faataa ia outou,       cf. Ioa 15, 16
ia haere outou, ’e ia hotu mai i te mäa,
’e ia vai maite to outou hotu, te na ô maira te Fatu.
Alleluia.

EVANELIA

« E haere outou e ati noa a’e te ao nei e poro i te Evanelia »

Evanelia o Iesu-Kirito a Mareko peata 16, 15-18

Ia tiafaahouraa, ua parau atura Iesu oia ia apotoro ahuru ma hoe : « E haere outou e ati noa a’e te ao nei e poro i te Evanelia i te mau taata atoa. O te faaroo ’e ua papetitohia, e ora ïa, area o te ore e faaroo, e faahapahia ïa. Teie te mau tapao e na muri i te feia e faaroo : e tiavaru ratou i te demoni i tö’u nei i’oa, e parau ratou i te reo api ; e rave noa ratou i te ophi i roto i to ratou rima ; ia inu ratou i te inu taero e pohe ai ra, e ore ratou e ino a’e ; e tuu ratou i te rima i nia i te feia ma’i, a ora ai ratou. »

- Haapopou tatou i te Parau a te Atua.