18 no Atopa - Luka ¨Peata

18 no ATOPA

LUKA PEATA
e papai Evanelia

Oro’a

TAIORAA MATAMUA

« O Luka anae teie ia’u nei »

A taio tatou i te epitore piti a Paulo peata ia Timoteo 4, 9-17b

E ta’u tamaiti here ra, ua faarue mai hoi Dema ia’u no te nounou i te mau mea o teie nei ao, ’e ua reva oia i Tesalonia. Ua reva Kerese i Galatia, ’e ua reva Tito i Dalematia. O Luka anae teie ia’u nei. Aratai atoa mai oe ia Mareko na muri ia oe, e tauturu faufaa rahi hoi oia no’u, no te ohipa a te Atua. Ua tono vau ia Tihiko i Ephesia. Ia tere mai oe, e hopoi atoa mai i te ahu pü tä’u i vaiiho i Teroa io Karepo ra, oia atoa te mau puta, ia rahi atu rä te mau puta i papaihia i nia iho i te iri puaa. E hamani ino rahi to Alekanedero tupai veo ra ia’u. Na te Fatu rä e faahoi I täna, mai te au i täna ra ohipa. E ara atoa oe iana, ua patoi etaeta mai hoi oia i ta tatou mau parau. I tö’u faatiaraa matamua ia’u iho i mua i te tiripuna, aore roa e taata i turu mai ia’u ; ua faarue anae maira ratou ia’u, eiaha rä te reira ia häio ti’a atu ia ratou ei hara. Na te Fatu r? i turu mai ia’u, ua faaitoito mai oia ia’u ia poro-hua-hia e au te parau tumu o te Evanelia, ’e ia faaroohia e te mau etene atoa ra.

- O te Parau ïa a te Atua.

SALAMO 144, 10-11, 12-13ab, 17-18

R/ E te Fatu e, ia faaite to oe feia faaroo,
i te hanahana o to oe ra hau.

Ia arue ta oe mau ohipa’toa ia oe, e te Fatu e,
e ia haamaitai to oe mau taua ia oe,
ia parau ratou i te hanahana o to oe ra hau,
e ia faaite ratou i to oe mana.

No te faaiteraa i te mau taata, i ta oe mau ohipa maere
e te anaana o to oe hanahana no to oe ra hau ;
O to oe ra hau, e hau ïa no te mau ui atoa ra ;
e to oe basileia e vai ïa i tera ui e i tera ui.

E parautia te Fatu i tona’toa ra mau haerea,
e te aroha i tana’toa ra mau ohipa ;
Te fatata nei te Fatu i tei tiaoro atu iana,
i te feia’toa i tei tiaoro atu iana ma te parau mau.

ALLELUIA

Alleluia. Alleluia.
O vau rä tei maiti ia outou ’e tei faataa ia outou,       cf. Ioa 15, 16
ia haere outou, ’e ia hotu mai i te mäa,
’e ia vai maite to outou hotu, te na ô maira te Fatu.
Alleluia.

EVANELIA

« Te rahi mau nei te auhune sitona, te iti nei rä te rave ohipa »

Evanelia o Iesu-Kirito a Luka peata 10, 1-9

I taua anotau ra, ua maiti atura ä te Fatu i na pipi hitu ahuru ’e ma piti, ’e ua tono tataipiti atura ia ratou, na mua iana, i te mau oire ’e i te mau vahi atoa e haerehia e ana ra. Ua parau atura oia ia ratou : « Te rahi mau nei te auhune sitona, te iti nei rä te rave ohipa. E pure maoti outou i te fatu o te auhune, ia tono ä oia i te rave ohipa i täna nei auhune. A haere ! Inaha, te tono atu nei au ia outou, mai te arenio i roto i te luko. Eiaha e afai i te farii moni, eiaha ei pute, eiaha te täma’a. Eiaha e ti’a noa i te aratia e aroha i te taata. E ia tomo outou i roto i te tahi fare, e matana outou i te parau atu e : “Ei hau i to teie nei utuafare !” ’E, tei reira te hoe tamaiti no te hau ra, e vai mau ä ïa to outou hau i nia i taua taata ra, ’e aita ra, e hoi mai ïa to outou hau i nia ia outou. E parahi outou i roto i taua fare ra, e amu outou ’e e inu hoi i tei horoahia mai, e au hoi te rave ohipa i täna utua. Eiaha outou e haere noa i tera fare ’e i tera fare. Ia tomo outou i roto i te hoe oire, ’e ia ite-maitai-hia outou, e amu outou i te tuu-hia-mai i mua ia outou. E faaora outou i to reira mau ma’i, ’e e parau atu ia ratou : “Ua faafatata mai nei te Basileia o te Atua ia outou.”

- Haapopou tatou i te Parau a te Atua.