30 no Novema - Anederea peata

30 no NOVEMA

ANEDEREA PEATA
e apotoro

Oro'a

TAIORAA MATAMUA

« Na roto i te faaroo taria maoti te faaroo mafatu ; ’e te faaroo mafatu o te faarooraa ïa i te parau a te Kirito »

A taio tatou i te epitore a Paulo peata i to Roma 10, 9-18

E taeae e, ia fä’i tö vaha e : o Iesu te Fatu, ’e ia faaroo tö mafatu : ua faatiafaahou te Atua iana mai roto mai i tei pohe ra, e ora ïa oe. Ia faaroo hoi tö mafatu ra, e arataihia ïa oe i te parautia ; ’e ia fä’i tö vaha, e arataihia ïa oe i te ora. Te parau nei hoi te papairaa mo’a : Te taata atoa e faaroo iana ra, e ore ïa e vare. Aita atura ïa e huru-’ë-raa i roto i te Ati-Iuda ’e te Heleni. Hoe ä hoi Fatu to te taata atoa, e hamani maitai rahi töna i te taata atoa e tiaoro iana ra. Te mau taata atoa hoi e tiaoro i te io’a o te Fatu, e ora ïa. E aha rä e ti’a ai ia ratou ia tiaoro atu iana i tei ore i faaroohia e ratou ? ’E aore to ratou taria i faaroo i te parau ra, e nafea ïa to ratou mafatu ia faaroo atu ? E nafea hoi to ratou taria e faaroo i te parau, ia ore te parau ia poro-haere-hia ? E nafea taua parau ra i te poro-haere-hia, ia ore te taata e tonohia atu e poro haere i te parau ? I papaihia ai e : Te nehenehe o te avae o te feia e hopoi mai i te parau api maitatai ! E ere rä te taatoaraa tei faaroo i te Evanelia, ua parau hoi Isaia : E te Fatu, o vai tei faaroo i ta matou parau ? Na roto i te faaroo taria maoti te faaroo mafatu, ’e te faaroo mafatu o te faarooraa ïa i te parau a te Kirito. Teie rä tä’u parau : Aita anei to ratou taria i faaroo ? Oia, ua faaroo to ratou taria : Ua atutu hoi to ratou reo e ati noa a’e te fenua nei, ’e ua atutu ta ratou parau e tae roa atu i te hopea o te ao nei.

- O te Parau ïa a te Atua.

SALAMO 19, 2-3, 4-5

R/ Ua parare atura to ratou mau reni na te ao nei.

Te faaite hua nei te mau rai i te hanahana o te Atua,
e te parau nei te reva i te ohipa a tona ra rima.
Te haapii nei te tahi ao i te tahi i taua parau nei,
e te faaite nei te tahi rui i te tahi i taua ite ra.

E ere teie i te faatiaraa-parau, e ere i te tuuraa-reo,
e ere i te reo o te tia ia faaroo hia ;
ua parare atura to ratou mau reni na te ao nei,
e ta ratou mau parau i te hopea mai o te ao nei.

ALLELUIA

Alleluia. Alleluia.
« A pee mai ia’u, te na ô maira te Fatu, Mat 4, 19
e faariro vau ia orua ei ravaai taata. »
Alleluia.

EVANELIA

« Faarue ihora raua i ta raua tau ’upe’a i reira ra, ’e ua pee atura iana »

Evanelia o Iesu-Kirito a Mataio peata 4, 18-22

I taua anotau ra, ’e te haere ra Iesu na te hiti i te miti i Galilea ra, ite atura oia i na taeae toopiti, o Simona, o tei parauhia o Petero ’e tona taeae ra o Anederea, i te tiriraa i te ’upe’a i raro i te miti, e ravaai hoi raua. Ua parau atura oia ia raua : « A pee mai ia’u, e faariri vau ia orua ei ravaai taata. » Faarue ihora raua i ta raua tau ’upe’a i reira ra, ’e ua pee atura iana. Haere atura oia e, pihai rii atu, ite atura i e toopiti ä tau taeae : o Iakobo a Zebedaio ’e tona taeae ra o Ioane. Tei nia raua i te poti ’e to raua metua tane o Zebedaio, te ene ra i ta ratou pu’e ’upe’a. Ua nomino atura Iesu ia raua. Vaiiho ihora raua i taua poti ra ’e to raua hoi metua i reira ra, ’e ua pee atura iana.

- Haapopou tatou i te Parau a te Atua.