28 no Eperera - Petero Tanaera Chanel

28 no EPERERA

PETERO CHANEL PEATA
e perepitero e te maratiri

Haamanaoraa i te Ariiepikoporaa nei

TAIORAA MATAMUA

« Ua tia i te Atua ia faaora i te feia faaroo i te maamaa o te pororaa Evanelia »

A taio tatou i te epitore matamua a Paulo peata i to Korinetia 1, 18-25

E au mau taeae e, e parau maamaa hoi te parau o te tatauro na te feia e pohe ; na te feia rä e faaorahia nei, na tatou, o te mana ïa o te Atua. Ua papaihia hoi : E faaore au i te paari o te feia paari ‘e e haamoi roa vau i te maramarama o te feia maramarama. Teihea te taata paari ? Teihea te papai parau ? Teihea te vanaa no teienei ao ? E ere anei ua faariro te Atua i te paari o teie nei ao ei maamaa ? Na roto i te paari o teie nei ao, aita to te ao nei i ite i te Atua i roto i täna mau ohipa paari, ti’a a’era ïa i te Atua ia faaora i te feia faaroo na roto i te maamaa o te a’oraa. Te ani maira te Ati-Iuda i te semeio, ‘e te titau ra te Heleni i te paari. Te a’o nei rä matou i te hoe kirito i faatataurohia, e turoriraa ïa na te Ati-Iuda, ‘e e parau maamaa na te etene. No tei nominohia rä, e Ati-Iuda ratou, o te reira ïa, e Heleni, o te reira ïa, o te Kirito ïa, o te mana o te Atua ‘e te paari o te Atua. E hau a’e hoi te paari o te parau maamaa a te Atua i te paari o te taata nei, ‘e te paruparu o te Atua, e puai a’e ïa i te taata nei.

- O te Parau ïa a te Atua.

SALAMO 116, 1, 2

R/ E haere outou e ati noa a’e te ao nei.
E poro i te Evanelia !

E aore râ : Alleluia !

A haamaitai i te Fatu, e te mau nunaa atoa e !
A faateitei iana, e te mau taata’toa e !

E mea puai tona aroha i nia ia tatou nei,
e tana ra parau-mau e tia i te vairaa e a muri noa’tu.

ALLELUIA

Alleluia. Alleluia.
A peemai ia’u, te na ô reira te Fatu. Mar 1, 17
E faariro vau ia orua ei ravaai taata.
Alleluia.

EVANELIA

« E faariro vau ia orua ei ravaai taata »

Evanelia o Iesu-Kirito a Mareko peata 1, 14-20

I muri a’e i to Ioane tapearaahia, haere atura Iesu i Galilea, ’e ua poro haere atura i te Evanelia o te Atua i te na öraa e : « Ua hope te tau, ua fatata mai nei te Basileia o te Atua : a tatarahapa ’e a faaroo i te Evanelia. » ’E te haere ra Iesu na te hiti i te miti i Galelilea ra, ite atura oia ia Simona ’e i töna taeae ra, ia Anedera, i te tiriraa i te ’upe’a i raro i te miti ; e ravaai hoi raua. Ua parau atura Iesu ia raua : « A pee mai ia’u, e faariro vau ia orua ei ravaai taata. » Faarue ihora raua i ta raue tau ’upe’a ra, ’e ua pee atura iana. Haere atura Iesu, ’e pihai rii atu, ite atura oia ia Iakobo a Zebedaio ra ’e i töna taeae ia Ioane. Tei nia raua i te poti, te ene ra i ta raua ’upe’a. I reira ihora, ua nomino atura Iesu ia raua. Vaaiho ihora raua i to raua metua tane ia Zebedaio ’e na rave ohopa i roto i te poti, ’e ua pee atura iana.

- Haapopou tatou i te Parau a te Atua.