22 no Febuare - Te nohoraa o Petero Peata

22 no FEBUARE

TE NOHORAA O PETERO PEATA
e apotoro

Oro’a

TAIORAA MATAMUA

« E taata paari atoa hoi au mai ia ratou ra ’e e ite hoi no te mau pohe o te Kirito »

A taio tatou i te epitore matamua a Petero peata 5, 1-4

E au mau here e, vau e a’o atu ai i te feia paari io outou na, e taata paari atoa hoi au mai ia ratou ra, ’e e ite hoi no te mau pohe o te Kirito, o te tuhaa-atoa-hia i te hanahana e faaitehia mai a muri atu. A faaamu i te nana a te Atua io outou na, a rave ai i to outou toroa tiai, eiaha mai te hoe ohipa i faahepohia ra, ma te aau maitai ra ; eiaha no te nounou taoa, ma te anaanatae ra. Eiaha outou e faariro ia outou iho ei fatu no te tuhaa e haapaohia e outou na, ei hioraa rä na te nana. ’E, ia fä mai te Tiai rahi ra, ei reira e noaa ai ia outou te hei hanahana o te ore e mahe’ahe’a ra.

- O te Parau ïa a te Atua.

SALAMO 22 (2), 1-2ab, 2c-3, 4, 5, 6-7a

R/ O te Fatu tô’u tiai : e e ore roa vau e ere.

O te Fatu tô’u tiai :
e e ore roa vau e ere.
I roto i te mau vahi matie api,
oia i aua mai ai ia’u.

Ua aratai mai ia’u i te pape e maha ai to’u rohirohi.
Ua faaapi faahou mai oia i to’u varua.
Ua aratai oia ia’u na te êâ o te parautia,
no te here i tona ra ioa.

E ia hahaere noa vau na ropu i te maru pohe ra,
e ore â vau e mataû i te ino ;
tei pihaiiho hoi ia’u to raau
e to turutootoo, ei haamahanahana mai ia’u.

Ua faanahonaho oe i te tahi amuraa maa i mua ia’u
i mua i te aro o to’u mau enemi ;
Ua faanoanoa mai oe i to’u nei upoo i te hoe faatahinuraa,
manii noa aera ta’u aua i rapae.

Oia mau, e haati mai te karatia e te oâoâ ia’u
i te mau mahana’toa o to’u nei oraraa ;
e ia parahi au i roto i te fare o te Fatu,
e maoro noa’tu te mahana.

ALLELUIA

Alleluia. Alleluia.
(I te Tau Maha ahururaa : Ei hanahana ia oe, e te Fatu e !)
O Petero oe, oia hoi e papa, Mat 16, 18
’e ei nia iho i taua papa na e patu ai au i ta’u Etaretia,
’e e ore roa te mana o te pohe e upootia i nia iana.
Alleluia.

EVANELIA

« O Petero oe, e horoa atu vau ia oe i te mau taviri o te Basileia o te ra’i »

Evanelia o Iesu-Kirito a Mataio peata 16, 13-19

I teie tau ra, ’e, tae atura ratou i te fenua o Kaiserea o Philipa, ua ui atura Iesu i täna mau pipi : « O vai au i ta te taata parauraa ? ». Ua pahono maira ratou : « I ta te tahi pae taata ra, o Ioane-Papetito ïa ; i ta te tahi atu pae, o Elia ; i te te tahi atu ä, o Ieremia, e aore rä, o te hoe o te mau peropheta ». Ua parau atura Iesu : « O vai rä vau i ta outou na parauraa ? ». Ua pahono maira Simona Petero, na ö maira : « O te Kirito oe, te Tamaiti a te Atua ora ra ». Ua parau atura Iesu iana : « E ao to oe, e Simona, tamaiti na Ioane e, e ere hoi na te tino ’e na te toto te reira i heheu mai ia oe, na tö’u rä Metua i te ra’i ra. O vau nei rä, te parau atu nei ïa ia oe : o Petero oe, oia hoi e papa ’e ei nia iho i taua papa na e patu ai au i ta’u Etaretia, ’e e ore roa te mana o te pohe e upootia i nia iana. E horoa atu vau ia oe i te mau taviri o te Basileia o te ra’i ; ’e o ta oe e taamu i te fenua nei, e taamu-atoa-hia ïa i te ra’i ; ’e o ta oe e tatara i te fenua nei, e tatara-atoa-hia ïa i te ra’i. »

- Haapopou tatou i te Parau a te Atua.